黃色橡皮鴨大家由細玩到大，最近仲玩到落PS3變身《SuperRubaDub》，玩家可以上網下載試玩版或購買完全版。首100位購買完全版的玩家可得到鴨仔精品，第一日上市，轉個頭馬上送晒！遊戲無論畫面同水聲的模仿都很傳神，連奸角鯊魚都可愛過人，有咩辦法唔大受歡迎！
記者：馬靜兒
攝影：林麖鈞、陳偉強
Model：Renee@Umovie
六軸控制唔使㩒掣
猶記PS3主機首度發佈推出，靚Game畫面睇到個個嘩嘩聲！當時測試主機能力的遊戲，就有呢隻《SuperRubaDub》；今次實地試玩已經係100%完全版，遊戲基本完全不用按掣，只是靠搖動手掣的六軸感應就可以；傾斜控制器來傾斜浴盆，鴨媽媽就會帶領鴨仔漂流過關；感覺係極驚歎PS3的處理能力，水波紋的即時反應配合光源變化，再加鴨仔順勢傾倒的物理反應，真係超有「力量」感，加埋遊戲玩法簡單，真係叫人一玩愛上。
趕鴨仔避鯊魚
玩家可以下載免費試玩版（共5關），下載FullVersion就超過60道關卡，並分為Fun、Tricky和Tough三種難度。每關都設有時限，鴨媽媽必須盡速帶領小鴨逃離浴缸過關。遊戲奸角是上鏈鯊魚（真係好鬼浴缸Feel），佢會追咬出了透明波波的鴨仔（Tough版大鯊魚，游得更快兼會咬透明波波內的鴨仔）。對付鯊魚的方法是鴨媽媽跳起，鯊魚就會反肚一陣子，趁此時機你就要馬上着草走人，真係幾爆笑吓！
鴨仔「跳」還有跳過隔欄的功用，這可省去慢慢游的時間，快些到達出水口。不過，有些浴盆是無邊的，鴨仔不小心就會跌落街兼扣時間，時間扣晒就過唔到關，真係兩邊做人難！
聲音好逼真
玩了1個鐘，記者已玩到唔願放手，其中一個原因是遊戲畫面同聲效質素好高。畫面顏色Sharp又靚，每一版的水都不同顏色，盆底更有不同圖案如星星、心心、波波，加上高清畫面，女仔一開始就給畫面吸引。但最值得讚的是音效好逼真，水流聲令你恍若置身澡堂，鴨仔游進出水口的聲音骨碌骨碌，鯊魚的摩打聲都好似真的一樣，食飽鴨仔仲會打飽嗝，玩落感覺真係幾爆笑吓！
鴨仔攻略
1.緊記順流行，死硬逆流而上好易俾鯊魚追到。遇到漩渦，可利用彈起的方法逃出。
2.利用澡盆無邊設計，一開始就先將鯊魚彈至反肚，再打斜澡盆將鯊魚倒走，就可以安心慢慢玩。
3.跌死一隻鴨仔只加一秒，遇上難度關卡，寧可掉一兩隻落街都要盡快完成，隨時加2秒幫你慳番十幾秒。
SuperRubaDub
機種：PS3
對戰模式：1-4人輪流遊玩
售價：$58
http://asia.playstation.com/superrub/
