屬於廸士尼電影近年最賣座嘅《魔盜王》系列，今日就會有第三集《加勒比海盜：魔盜王終極之戰》戲院上畫，今集除繼續大賣型男尊尼特普海盜Look外，發哥個中式魔盜王造型，都係叫人入去一睇原因；入場睇完唔夠喉，記得仲有與電影同步推出嘅同名遊戲，玩家將有機會成為電影主角，於海盜世界橫行冒險。
記者：許福合
海盜都要聲譽
唔知《魔盜王3》幾名主角中，邊個最啱你口味？無論如何，遊戲內你都可以化身當中幾名主角巴積克、鄧維廉同史伊莎，去挑戰電影內出現過嘅反派，例如中國海盜、東印度貿易公司同埋不死軍團，都可由你親手解決！
而每名角色都有特定能力及技能，遊戲中亦會出現唔同武器，不過玩一陣你就會發覺仲係刀劍殺得最過癮最有效率，甚至有連續技系統，仲以為玩緊日系遊戲。不過唔知係咪避免遊戲太暴力，系統中包括一個聲望系統，殺得勁唔一定高分，有時收集金幣、將敵人掟落海分數會更高，想輕鬆過關就要留意喇！
發哥變咗做鬼佬？
電影公司形容周潤發係全亞洲，甚至全世界最受歡迎演員之一；原本玩遊戲時仲一心諗住睇吓發哥風采，誰知遊戲官網甚至各大遊戲網站，都見唔到發哥個遊戲造型，好多人仲估，唔通隻Game冇佢份？呢個大疑團終於喺PC版遊戲盒底解開，見到佢細細張相，似嗎？一般喇，硬係有種鬼鬼哋嘅感覺！
玩法跟足電影
遊戲將於多個平台上推出，不過要數最具電影感同畫面靚，當然以XB360、PS3同PC版為佳，幾個版本玩法相近，最重要係故事劇情都跟足電影，咁先至可以叫人玩得投入！仲記得上一集結局係點？最後巴積克被奸角魔王吞噬，鄧維廉同史伊莎後來得知巴積克最終被鬼船長拘禁，故事就係講佢哋越洋過海，要救出船長巴積克！
機迷品評：邊個最似樣？
餅印一樣 巴積克（尊尼特普飾）
阿鋒：勁鍾意玩電影改編遊戲；遊戲中像真度最高係巴積克船長，頭髮鬍鬚一樣咁亂，面形輪廓都似到十足，唯一唔同係電影內尊尼特普眼神比較凶狠，遊戲內似乎和善得多！
真人配音乎？
史伊莎（姬拉麗莉飾）
Kennis：已經睇咗《魔盜王3》首映，比較留意靚女史伊莎；遊戲造型都激似真人；搞笑者係佢身手麻麻哋都喺遊戲中呈現；另外遊戲配音亦勁似，唔知係咪真人配音呢？
靚衫跟到足
鄧維廉（奧蘭度布林飾）
阿宜：曾經飾演過《天國驕雄》嘅奧蘭度布林我最鍾意，遊戲內佢扮演嘅鄧維廉同電影內亦非常酷似，尤其佢成日着住嗰套衫，遊戲內原裝照抄，成為佢嘅招牌一樣。
Profile
機種：PC/PS3/XB360/Wii/NDS/PSP
開發：DisneyInteractiveStudios
類型：動作
人數：1-2人
