早幾年恃紅生驕、遲到兼唔綵排嘅紅模「保分」，近兩年事業真係沉到谷底，工作量大減，見報率又低，大婆台之前無端端搵佢主持外埠美食節目，人人稱奇，原來個節目係搵正印女廚神「娃娃」去㗎。
不過大婆台怕同「娃娃」拍劇撞期，臨時臨急諗起「保分」煮嘢有一手咪搵佢，同埋話晒名模成日放洋行騷，法文唔識，英文都得啩，點知「保分」去到外國，原來係英文有限公司，拍嘢時，完全同當地大廚、公關零交流，自己又好尷尬，氣氛大減，最弊係「保分」仲要冇乜觀眾緣，節目出街收視極低，大婆台一班編導同贊助商，都大歎搵錯人。
撰文：阿蘇
本欄逢周一至六刊出