人行突然落重藥醫股市瘋狂症，昨日A股開市只係跌咗少少，收市仲升番啲，港股都冇乜損傷，算係執番身彩，不過，呢場戲啱啱開始，好戲應該仲喺後頭。
恒指仲係喺21000點關前面掙扎，朝頭早升上21055，晏晝又碌番落20927收市，升22點，成個局冇變過，10日線升上20837，大市短線波動區又收窄。
宏調措施出台，昨日國內股民咁唔畀面，人行會唔會好快又加息，睇嚟唔會，人行做大事情，唔係玩鬥氣，加息之後例牌要睇一陣先，睇嚟要到下個月中先至會再有行動，如果到時加咗都冇反應，過多一兩個月會再加息。
吳儀去美國「講數」，焦點喺人民幣升值，放寬人民幣日波幅唔會滿足到美國嘅胃口，咁大家就明白點解昨日航空股咁多買盤，睇個勢仲有好大上升空間。
兗煤C輪7378：兗煤（1171）昨日收9.61元，上禮拜五挨近條10日線即刻有反應，昨日破旗咁嘅款，今日有機會試9.90元，如果成交增加，破位就睇10.60元，可以買啲兗煤C輪7378。隻輪昨日收2.65元，槓桿率3.6倍（有效3.2倍），正股升上10.60元，7378應該喺3.50元樓上，正股跌穿9.10元止蝕。