一早已經同大家提過，話我悠穎馳好鍾意上網周圍搵，睇吓有無啲好舊兼好正嘅汽車廣告片，點知早排搵到個MadeinHongKong嘅ToyotaCorolla廣告之後，早兩日搵到個仲正㗎喎！哈，呢個廣告就巴閉啦，事關唔止係MadeinJapan，一開頭大家仲會見到部直升機，佢慢慢升高之後，你就會發現佢下面原來吊住部Isuzu嘅貨車（無錯，係一部真嘅貨車！），飛到咁上下高仲解埋吊纜，實行嚟一次空投Isuzu貨車；咁都唔誇張，跟住仲有個戴晒頭盔着晒制服嘅司機大佬衝埋去，諗都唔諗就跳咗上車揸咗去劈沙地㖭！呢個廣告講到部車咁厲害，睇到我同細佬樂祥眼都突埋。
後來睇番個Heading，先知呢條廣告片原來係1986年嘅產物，雖然已經有成21年歷史，但睇番都仲覺得好正，而且仲好明顯咁Sell到部車嘅特性，真係覺得好過家陣某啲你睇完幾次，都唔係好明佢想講乜嘅廣告！
悠穎馳
豪邁不羈，愛車如命，聽幾下引擎聲就知咩車！
網址： http://www.youtube.com/watch?v=Js4Spc2qSNg