【第三話】在無綫工作28年，以前你會覺得他熟口熟面，但可能叫不出他的名字，但今時不同往日，現在他無人不識，所有人都知道他是細契情夫常在德，他就是李成昌。觀眾或者以為《溏心風暴》細契最奸，其實劇情發展下去，細契最終會栽在常在德這個衰人中的衰人手上。近日在街上經常被師奶阿叔手指指叫姦夫，李成昌不但不介意，還樂在其中地說：「以前都演過好多衰人，常在德呢個姦夫都算係最衰。」
大契李司棋和細契關菊英憑出色演技在《溏心風暴》中彈出，成為焦點所在，不過牡丹雖好仍需綠葉扶持，劇集接近尾聲，細契身邊出現了第二春，他就是常在心的衰大佬常在德。
幽會拖手肉麻爆笑
扮演這個衰人常在德的李成昌說：「以前都演過好多唔同嘅角色，做過好多衰人，常在德呢個姦夫都算係最衰，又呃人錢，幫人睇狗又拎人哋隻狗去配種賺錢，成日屈得得地嘅錢，不過衰人都會行好運，識到個失意婦人細契，佢都算衰，教細契點爭家產，又呃埋佢30萬私己錢走佬，內地仲有老婆同個仔，係咪衰到貼地？」
劇中常在德每次跟細契幽會，都會約在燈光幽暗的夜總會，兩人手拖手情深款款對望，場面肉麻得來又非常好笑，李成昌說：「兩個都咁上下年紀，都係適可而止，過火觀眾會反感，同細契好多場戲都好深刻，我記得有一場我要扮到傷心欲絕好唔捨得佢，最後搞到細契感動落淚，呢一場我好鍾意；仲有另一場，就係細契發現我有老婆有仔，之後佢仲要喺記者面前死撐，後來佢突然失去理智想開車撞死我，呢一幕都好難忘。」
落手落腳設計角色
不過李成昌自言很喜歡這個姦夫角色，因為此角色由他一手設計出來，他說：「好多謝監製家豪哥放心畀我去設計呢個角色，處理呢個姦夫唔可以令人太討厭，過火就會令觀眾討厭，所以我演繹得比較輕鬆，同埋個造型都係我諗，當佢行運有錢，黐住阿琴開始風騷就扮嘢，其實呢個年紀係唔會着花恤衫，我就特登着花恤衫扮有型，突出呢個人物嘅性格。」
採訪：楊潔雯 攝影：陳偉權
