好多網友都知道無綫節目《美女廚房》抄日本同類型節目，阿Net最近睇過4年前嘅日版《美女廚房》，竟然發現人氣靚女澤尻英龍華、水着偶像小倉優子同過氣水着女浴優係其中一集嘅參賽美少女，佢哋當年嘅純情look就攞足滿分，可惜煮嘅食物就令評判擰晒頭。
澤尻得個樣
當日比賽先叫一眾美少女劏魚，然後再以北海道名產薯仔嚟炸薯仔餅。當年19歲嘅小倉煮嘢最恐怖，佢見到條魚劏唔死，竟然監生放去微波爐叮一叮，之後炸薯餅時又話想整得好味啲，竟然加埋朱古力落去，「好食」程度唔使講都知啦。不過最令阿Net火滾嘅，係佢自己試食時，竟然用把懶可憐嘅聲音堅持食物唔係好難食，評判最後評佢嘅烹飪技術屬上、中、下邊級時，就連下級都不如，阿Net都覺得抵佢。
至於當年只有17歲嘅澤尻就話佢媽媽係經營餐館嘅，阿Net見佢煮餸時有板有眼，捉魚又唔驚，以為佢烹飪一流喇，可惜評判最後都話佢嘅烹飪技巧連下級都唔入，真係羞家。
日版《美女廚房》前篇
網址： http://dv.ouou.com/play/v_3d387238fd3d3.html
日版《美女廚房》後篇
網址： http://dv.ouou.com/play/v_38d7f2dea03d7.html
版主：阿Net
本欄逢周一至六刊出