中央三管齊下，壓制內地股市熱火，由於政策早已在市場預期之內，相信影響不會太大，而中央亦會繼續深化冷卻行動，務求在未真正爆煲之前，力壓狂潮，即便日後泡沫爆破，災難性亦可減到最低。
要冷卻股市，中央有好多招數，三招四招可接踵而來，但中央現時最頭痛的，唔係冇辦法冷卻股市，而係泡沫爆破後，如何善後？
其實，坦白講，中央現時要諗嘅，係如何令股市可以「有秩序」地回落，如何為股民設下「安全網」，等佢哋唔好跌得太傷。一旦出現股災，而中央又無適時的「救市」行動，引發民憤同社會失衡，後果會好嚴重。
中國放寬QDII，為A股「排洪」，而外圍股市升勢持續，迭創新高，對港股都有利；加上A股降溫，而港股相對上又較為吸引，唔排除會有更多民間資金，透過不同渠道南下，港股在21000點大關整固完成後，有力破位而上，再創新高。
主席增持有啓示
港股大時代，證券經紀大豐收，但股價冇反映，就以結好控股（064）為例，05年底股價0.624元（已除息），現時0.73元，1年半以來，升幅只得17%，而PE亦只係6.4倍，股價大落後得好唔合理，而結好近年拓展孖展信貸業務同澳門旅遊娛樂事業，又係賺到笑，整體盈利隨時會有倍計增長。
有幾點理由，足以令大落後嘅結好開快車，從後趕上。
1.股市大旺，結好每日成交相信唔會少過4億元，每月的淨佣金收入已有1000萬元。
2.孖展業務又係飛躍猛進，聽講孖展額已超過13億元，比去年底高出7成，以P+3計，每月利息收入又成1200萬元。
3.07年度（3月年結）上半年，結好獲利4424萬元，上升83.5%，下半年度佣金同利息收入大增，全年盈利可達1.6億元，大升1.6倍。
4.公司夥拍澳門金都酒店大股東鍾貴大舉發展澳門業務，相信好快會有好消息。
5.主席洪漢文兩個月內大手增持，持股量由41.91%增至48.84%，信心爆棚，唔排除短期內就會有大動作。