上星期已除淨，透過10送10紅股拆細嘅中國無線（2369），股價走勢可謂不鳴則已，一鳴驚人，上周五再升35%。同宏安（1222）一樣，純拆細都未必夠力炒高股價，上周宏安都要靠配股畀雷曼當好消息，中國無線亦都有好嘢。
上周五公司宣佈，其深圳附屬獲中國信息產業部撥款200萬元人民幣，資助開發供3G網絡TD-SCDMA應用之智能手機操作系統及軟件方案。唔好睇少呢200萬銀，由信產部出面搵佢開發至係關鍵，開發完定單有排計，不過中國無線炒高咁多應該都係炒呢個消息，提防有人趁好消息出貨。
此消息亦意味TD-SCDMA嘅3G網絡好快出台，要搵定3G手機嘅相關受惠股，首選係晨訊科技（2000），其於手機設計解決方案及手機設計商中有領導地位，早前公佈的業績，去年純利增長28%至3.72億元，正是受惠於內地對TD-SCDMA的3G手機解決方案需求顯著增長。
集團已推出集手提電話與流動電視於一身的手機電視MobileTV，及Wi-FiGSM手機產品，料續有新設計，可成為今年業績增長重大動力。大摩早前都出報告，話晨訊業務模式異於同業，盈利增長前景清晰，首予其增持評級，目標價睇3.77元，現價仲有33%上升空間，如果買中國無線賺咗，更要換馬至晨訊。
工業股仔忽然炒上
上星期五分別有兩隻傳統工業股仔忽然炒高，就係台和商事（1037）同東力實業（978），分別升48%及28%，呢兩隻亦都係長年都唔會有人炒作嘅「化石股」，何以忽然變成股價急升嘅「炒股」？假如話工業股要被重新估值，似乎未有足夠條件，起碼人仔升值已經大大不利，答案應該都係市場錢多得滯。