在一片憂慮聲中，人行嘅宏調終於出台，之前咁多次嘅措施都好似對個市冇乜影響，今次又點呢，咁就要睇吓今次嘅措施同之前有乜唔同。
今次3項措施，擴闊人民幣波幅係對花旗嘅安慰措施，同冷卻國內瘋狂股市同樓市冇關係。以前加息好少郁到貸款息率，今次就唔同，存貸款息率同儲備金一齊加，可以當係重藥一劑，個病咁重，一劑藥掂唔掂？唔多睇好，不過，「三加」齊出，人行同鑊鏟友講得好清楚，「唔好亂嚟」。有朋友仔問落重藥中央唔驚整冧個市，影響埋出年嘅奧運咩？呢啲當然有諗，但係領導人諗嘅嘢點會只係得呢啲？股民成日以奧運前股市唔會跌呢個諗法「胡作非為」，隨時累死自己。簡單嚟講，人行要落重藥，即係話個病好重，如果一劑唔掂，好快就會整第二劑。花旗股市上禮拜五雖然升，但係呢幾日炒港股都要小心啲。
中遠洋C輪9285：中遠洋（1199）現價20.25元，上禮拜五試10日線之後反彈，呢兩日如果升破21元，又可以炒上去，可以買啲中遠洋C輪9285。輪價29.5仙，有效槓桿4.2倍，正股升上23元，9285會見48仙，正股跌穿19.30元止蝕。