百物騰貴，如果打工仔無得加人工，啲錢又唔夠使，點算好？除咗慳啲使之外，就梗係諗計搵外快啦！不過，家陣有咩秘撈最搵錢呢？
網友annelouise喺《MSN》嘅討論區度話：「我會參加各式各樣嘅比賽，一年都可以搵到2000至3000蚊美金（約1.56萬至2.34萬元港紙）；又會幫手做一啲網上調查，大約可以賺到500蚊美金，就連執銀仔一年都有15蚊㗎！」
參加比賽贏獎金
睇落好似幾和味，但係一年有冇咁多比賽可以參加先？仲有，係咪個個都咁好彩贏到獎金呢？
Fabulosa就話會放貨上eBay賣，但就埋怨運費太貴會削弱利潤。
不過，做生意始終都要成本，對手頭資金緊絀嘅打工仔未必適合。
如果擁有一技傍身，搵外快就方便好多，好似網友Indy83咁，佢每逢周末都會充當攝影師，去婚禮幫新人影相，一個鐘收費都有75蚊美金（約585蚊港紙），呢類兼職收入相當豐厚。
網友NMAZ就話：「除咗日頭份工之外，我間中都會兼職寫吓稿，或做吓編輯嘅工作，一年大約賺到2萬蚊美金（約15.6萬港元）。」
佢份兼職係咪優差就好難講，但可以肯定嘅係，呢份工嘅收入一定多過好多打工仔嘅年薪。