黎明（Leon）、古巨基、容祖兒、楊千嬅同Twins等，前晚齊集江門市體育場，出席「第四屆勁歌王年度總選頒獎典禮」，黎明得4個獎係最多獎嘅歌手，佢嘅AMusic總共攞咗16個獎做埋大贏家，攞晒彩。
「給點掌聲」
環球正東得張敬軒攞一個獎，李克勤同陳奕迅冇晒影。最受歡迎係李宇春，香港歌手就以古巨基、側田同Twins嘅反應最好。因為天雨關係，大會安排歌手上台唱歌，頒獎留喺慶功宴先做，希望快啲結束個騷。鍾欣桐、楊千嬅、鄭融同容祖兒等女歌手着晒四吋高踭鞋，天雨台滑，好彩冇意外，反而關智斌（Kenny）表演時踩親膠袋成個跌低，佢起番身仲笑住話：「可以給一點掌聲鼓勵我嗎？」
林海峰喺鄭秀文個唱提議東亞買《溏心風暴》版權，改編成《東亞風暴》，前晚何韻詩話做莉姨好，最緊要班阿姐搵多啲錢返嚟畀佢錄音出碟。做細契嘅楊千嬅就話：「咁爆？做生意唔好叫風暴，角色有得發揮我又冇問題，林生（林建岳）肯埋位先算啦。」做得得地嘅黎明話：「貢獻少少畀佢娛樂冇所謂。」
講到黎明揀咗隻歌《化》畀千嬅做第一主打歌，但反應麻麻，所以傳兩人不和，千嬅就話：「𠵱家首歌攞獎，證明唔係囉。」黎明就講金句：「千嬅又好，Leon又好，大家都經歷好長時間去面對我哋嘅工作，我哋非常成熟。」
