長實主席李嘉誠上個禮拜先苦口婆心叫大家將時間同資金投放喺固有業務上，好好咁經營，千萬唔好只係掛住投資股票或者炒股。號稱香港股神嘅恒地主席四叔李兆基，噚日喺煤氣股東會亦開壇，明講投資心得之餘，仲教大家乜嘢叫投資同投機，話淨係用投機嚟賺錢就唔好，強調自己屬於投資嗰類，所以唔理個市升定跌，佢都有錢賺……但暗裏似係回應誠哥嘅一番話。
「投資投機論」有感而發
股東會臨完場，四叔突然冇頭冇尾咁講咗句：「有好多講法（華華推測係回應有人暗示佢投機呢樣嘢），話投機賺錢唔啱」跟住又話：「我有三大投資項目，第一項係老本行恒地，雖然近年冇大增長，但年年有錢賺，夠穩陣；第二項係煤氣，每年都有好多新項目，大陸發展潛力大，香港業務又穩定；至於第三項，就係私人投資企業（兆基財經）。」
四叔再講：「我呢個私人投資，好健康又好有秩序，買賣正股之餘，又利用好多工具套戥，所以個市升我有錢賺，個市跌我又有錢賺。」若果唔係，04年成立嘅兆基財經，資產總值又點由500億暴漲至𠵱家嘅1200幾億呢？
心多嘅華華聽到呢度，就諗起上個禮拜誠哥一片苦心叫香港同內地投資者，唔好忘記歷史，最緊要量力而為，尤其嗰句「香港人要實實在在為香港做長遠有利的事。」又話香港唔可以靠炒股同投機嚟維持繁榮，華華唔知道四叔係咪聽見誠哥咁講，先有感而發，唔知遲吓仲有冇人有嘢同記者（或對方）講？
[email protected]