【第二話】林峯飾演的程亮與鍾嘉欣飾演的常在心，在人氣劇集《溏心風暴》中甜蜜過也哭鬧過，經歷風風雨雨的愛情，卻因程亮難抵誘惑，與蒙嘉慧飾演的水擘擘大搞三角戀。男人本性總是花心，程亮的拖泥帶水，更令觀眾反感，連林峯也說：「睇到自己處理呢段感情，都覺得好乞人憎。」
無綫劇集《溏心風暴》以唐家爭產及家族內鬥為主線，經營鮑魚生意的大鮑夏雨樂天知命，得得地陳豪則儍頭儍腦個性率直，擦出幽默效果，除了細契關菊英的角色乞人憎令人看得咬牙切齒之外，感情線則着重在林峯飾演的程亮和鍾嘉欣飾演的常在心身上，這段婆媽感情戲，近日同樣極具爭議。
「常在心都有唔啱」
介入程亮和常在心之間的水擘擘（蒙嘉慧飾），本是常在心好朋友，卻不顧姊妹情義發功狂追程亮，令愛得癡纏的常在心終日哭哭啼啼。程亮徘徊在三角戀中，離離合合，最終仍逃不過慘死結局，令人傷感。
其實程亮和常在心深愛對方，奈何遭受命運愚弄，陰差陽錯你追我逐，林峯說：「男女觀眾睇完有唔同感覺，男仔睇完一定覺得常在心唔啱。我同常在心好愛對方，但每次都因觀點唔同而鬧交、分手，不過常在心明知得得地鍾意佢，都舂個頭埋去，完全冇理男友感受，係男人都嬲啦，唔可以怪晒程亮。水擘擘就完全相反，每件事都遷就我先，遇到挫折時，每個男人好正常都會心動，而且常在心都有唔啱。」林峯這樣形容劇中的三角戀：「好聽叫負責任，唔好聽叫拖泥帶水，奈何情到濃時又冇法控制。」
大讚劇本有水準
回想鍾嘉欣為投入常在心的角色，林峯也不禁戥她辛苦，他說：「鍾嘉欣每日拍戲都要喊，佢屋企條線又接唐家，都係要喊，搞到佢眼都腫埋。我當時同蒙嘉慧（水擘擘）演偷情戲時，每日都要互相安慰，問對方得唔得，可唔可以投入到，演時真係唔太舒服，𠵱家睇番自己喺劇中處理感情嘅方式都好憎自己。」
林峯又大讚《溏》劇劇本乃水準之作，雖然程亮的花心本性漸漸現形，一段三角情愛也不討好，但其家人及fans看後均覺得程亮與常在心相襯，林峯說：「角色唔討好唔緊要，只要演得好，咁多人有反應都係成功。」
採訪：卓寶花
攝影：仇志德
化妝：Raymond@maevonmakeup
髮型：DYbyHairculture
