美國女權運動雖然搞咗幾十年，但當地男女嘅薪酬仲係唔平等。根據美國大學婦女教育基金協會（AAUWEF）調查發現，美國女性喺大學畢業1年後，薪酬只有同等資歷嘅男同事八成；差距仲逐年擴大，畢業10年後，人工只有男性嘅69%。mcnbcbizeds喺《MSNBC討論區》問：「點解男女薪酬差距咁明顯？」
FoonTheElder話：「女性比較抵得諗，人工低啲都肯做，而男性就少個崩都唔制，所以婦女搵銀唔夠男人多。家陣唔少行業（例如會計界）都鍾意聘請低薪女職員，令到男女薪酬差距越拉越闊。」
女人揀工多挑剔
WashingtonSandTFellow講：「男人鍾意做工程師或者電腦專家等高薪職位，女人就唔肯做厭惡性或者有危險性嘅工作，又唔願意去偏遠嘅地方返工，自然唔夠男人搵錢多。」
喺大公司任職嘅DogLady呻：「我公司入面，女性嘅晉升機會細過男性，啲男職員經常被派去參加培訓、出席座談會或者會議，女職員就無份，好唔公平！」
AAUWEF研究主任凱薩琳．希爾話：「多數美國老闆認為，女性生育後唔會再出嚟打工，所以唔多願意晉升女職員，呢個情況令男女薪酬出現差距。」佢認為美國學校應鼓勵女性主修科技，以投身更高薪嘅職位，而國會亦應立法促進男女薪酬平等。
身為公務員嘅PHXBUYER反駁：「美國政府機構冇同工不同酬嘅情況，員工薪酬係視乎職位同職級而定。」RONWORK話：「我喺《財富》十大企業其中一家企業打工，發覺好多女職員都搵錢多過同等職位嘅男性，各位唔好忘記AAUWEF係婦女組織，佢哋嘅調查報告可能偏幫女性。」