搞有色金屬供應鏈嘅利記控股，眨吓眼就六十大壽，噚日喺灣仔會展搞慶祝晚會，行政總裁陳婉珊（Clara）同華華話當年，佢太爺喺油麻地新填地街嘅一間豆腐膶五金店做起，生意越做越大，舊年公司已包辦77%內地鋅入口量，𠵱家中國用鋅量約100萬噸，每年增長10%，前景非常樂觀。
利記𠵱家主要做台資同港企嘅生意，嚟緊會喺越南同印度加強上下游發展，未來會喺華南同華東設加工中心，希望09年鋅同鋁嘅加工能力，可分別增加10萬噸同9萬噸喎。
講完古仔，佢仲送出甲子大禮盒，內有紀念金幣、利記首日封同歷史圖輯，等大家回顧吓公司嘅發迹史。之不過，Clara話明呢個金幣唔係9999千足純金，只係利記嘅錫合金製品，成本唔高。