分析員個CFA牌有幾難考，好多人都領教過，咁考到兼執業之後，理應更加尊重同埋愛惜呢份「高尚」嘅工作，但唔知點解，偏偏好多人鍾意貪埋啲小便宜，專向客仔攞着數，最後除咗俾人踢爆，有人仲試過冇埋份工！
話說同分析員、芬佬打交道，係每間上市公司的指定動作之一，飲飲食食當然唔少得，整整吓就令一啲執筆寫研究報告嘅分析員，當正自己係無冕皇帝打橫行，而當年電訊行頭仲係好景嘅時候，就經常發生分析員問人攞手機嘅情況！
胃口越嚟越大
老友話，響電訊行頭好多人都領教過，啲高薪厚祿嘅芬佬同分析員，飲飽食醉都未夠，出trip又要食好住好，更正係會當面問上市公司啲老細，買機、用人哋啲服務有冇得平，通常班老細都醒水，唔介意畀呢啲雞毛蒜皮嘅着數佢哋，問題就開始發生……
皆因手機不停有新款，而夠膽厚面皮攞着數嗰班分析員，依時依候問人哋有咩新款，仲加句「你老細應承咗畀㗎」，起初，啲老細都忍住唔出聲，咪當自己係夜總會經理簽酒畀啲熟客咁，簽啲手機畀佢哋，但長遠唔係辦法，手機出新款嘅cycle越嚟越短，班害群之馬要嘅量，亦越嚟越大，老細忍無可忍，咪暗暗向啲大行老闆投訴，當然，梗係有人人頭落地啦！老友話，近呢幾年再冇乜呢啲情況，就算有都係好零星……鬼咩，𠵱家班operator仲窮過鬼，搵咩嚟簽手機畀人？
[email protected]