賓架P請食晚飯，神神秘秘，唔講理由，左丁山第一個去到馬會打吡廳，先知道賓架P已包下私人房，一張長枱擺開，可坐十四人，左丁山諗吓，幾隆重噃，唔通賓架P有喜事？五分鐘後，建築F駕到，帶埋禮物嚟，問佢搞邊科，建築F話：「平時老友食飯，一個電話通知啫，今勻由佢秘書出馬打幾次電話嚟，實係有事啦！畀我問得兩問，秘書透露口風，今日係波士結婚紀念日。」
唉吔，我哋大頭蝦，食人餐飯，竟然手空空，一梳蕉都唔帶嚟，認真唔好意思。建築F同賓架P好熟，皆因一齊去英國打山雞。兩人都係GunClub（槍會）發燒友，不時相約去英國打獵，賓架P話英國人打雀，有唔少規矩，好多人靠打獵呢行搵飯食。譬如佢哋去打山雞，隨行嘅有loader，負責同獵槍入子彈、退彈殼；有beater，負責敲打草叢，趕啲雀鳥飛上天空；有doghandler，帶住啲狗去搵雀。狗聞到雀味之後，望住草叢（bush）唔會走開，此時beater上前打草，loader遞上槍枝，山雞、鷓鴣等一飛出來，建築F與賓架P就開槍。亁淨雀屍自會有人撿起，滿身血之雀屍有人收起當垃圾。年年打山雞，雞從何來？賓架P話：「有農場飼養，到打獵季節就放出嚟。」
記得好多年前，賓架W入咗西敏寺銀行，要到牛津受訓幾個星期，課程包括飲紅酒與獵狐。現在英國愛護動物人士推動之下，禁止獵狐，唔少人失業，幾百年英國鄉紳傳統成為「集體回憶」。打獵都要講紳士風度㗎，賓架P與建築F打水鴨之時，beater擊水，獵狗狂吠，水鴨就是不肯飛上天，甚至上咗岸，都係在地爬行，點都唔飛，成為sittingduck。賓架P話：「有教養之紳士唔會射擊sittingduck，啲鴨好醒目，知道一飛上天就會被射殺！」亂槍掃射sittingduck咪變成「屠鴨」，不是「獵鴨」，為紳士所不齒也。