新Game王:女機迷打NDSLite<br>最愛應援團

新Game王:女機迷打NDSLite
最愛應援團

聽過唔少NDSLite女機迷講過︰「女仔打機,唔似男仔不斷追新game,最緊要係好玩。」正當記者一廂情願,諗住女機迷仲係沉醉於舊game《瑪利奧賽車》之際,原來佢哋已經開始喪煲一隻出咗只有一星期嘅新game《應援團2》。又話女仔唔追新game?學佢哋話齋,咪因為隻game太過癮,夠好玩囉!

記者︰陸俊雄
攝影︰楊錦文、陸俊雄

朝日町團長鬼龍院薰

夕日町團長百目鬼魁

唔多用腦最緊要快

對於「應援團」呢個名,唔多熟日本文化嘅朋友可能會好陌生,實情係指啦啦隊、打氣團等意思。《應援團》早在第一集時,已經大獲好評,到第二集同樣延續強勁打氣節拍,加上抵死嘅角色插圖,令少女們大叫過癮夠fun。實際上《應援團2》玩法好簡單,可以話係《太鼓之達人》嘅變種,跟住越來越快的音樂節拍,用筆喪篤螢幕上的123圓圈,或者睇準時間盡情打圈,總之唔多使用腦,反應快夠投入就過關。

■你睇兩大猛男打氣團,未玩都估到遊戲會以強勁節拍吸引玩家。

■個個《熱血硬派》咁嘅樣,同時又令人諗起《幽遊白書》個桑原。

■相撲手決戰大笨象,幾古怪的場景都有。

■由你挑選三個猛男組成應援團,321,ready!幾有氣勢。

■返工做嘢都需要人打氣,你篤得唔準打圈唔夠快,就會好似右圖咁嘞!

《應援團2》Profile

對應機種︰NDS
遊戲類型︰節奏音樂
開發廠商︰INIS
推出日期︰5月17日
定價︰$256

■新出只有一星期,《應援團2》已深受少女歡迎。

《應援團2》Fans
Becky

「我仲係初哥階段,只玩啲節奏冇咁快嘅項目。」

Angel

「單係睇《應援團2》啲角色插圖已經夠過癮,好似睇漫畫咁。」

Susan

「打落越來越快,篤數字又要配合外圈加內圈,好刺激㗎!」

Sally

「啱啱先喺地鐵打完,隔籬個小朋友望住我起勢打圈。」

全情投入媾仔

女機迷除咗個個走去做啦啦隊之外,緊接另一隻近期最紅嘅,就係出咗兩個月嘅媾仔遊戲《Girl'sSide1stLove》。「Love」冇錯係談情遊戲,係名牌game《心跳回憶》的女追男變種,夠晒追得上今日社會潮流。遊戲畫面上,可以見到唔少有如少女漫畫的男角,個個面尖尖,返去《流星花園》年代。玩法可以話係舊酒新瓶,目的要成功約會對方,行街睇戲食飯乜都好,要人家成為你男友為止。

■若男角肯為你演奏一曲,證明你已經成功了大半。

■Game內有好多角色、對象供選擇。

■嘩!好少女漫畫呀!個男仔靚到吖……

《Girl'sSide1stLove》Profile

對應機種︰NDS
遊戲類型︰策略模擬
開發廠商︰KONAMI
推出日期︰3月15日
定價︰$256

《Girl'sSide1stLove》機迷
May

「我衰咗幾次喇!俾對方話我安排嘅節目好悶,跟手拒絕咗我。」

Coral

「啲男角有成熟有後生,唔同性格要用唔同方法吸引佢哋。」

Jennifer

「有時一個人搭車悶悶哋,玩吓個game都唔錯呀!」