繼早前講話睇住K寶嚟打，香港寬頻老闆王維基噚日再下一城，整個新口號──「無須有線一樣精彩」，登記用佢個bbTV仲有WiFi送，明刀明槍咁去搶客，極度夭心夭肺。
K寶海哥聽到相信都會心寒！雖則話「10蚊台」下個月面世，但K寶冇咗英超之後同bbTV嘅「昌爐」真係所差無幾（唔計有線新聞），難怪老王咁寸！
以老王嘅脾性，華華估計佢絕唔會賴低歡喜寃家8號仔，好快就會整番個「超越現在（now）」嘅口號畀二少歎。
講開老王，城電上個禮拜派成績表，派4仙中期息回饋大小股東。
噚日股價升近四成，最肥仔梗係「奀枝枝」嘅老王啦，事關佢同有關人等hold住城電近六成，應該請班共度時艱嘅手足食餐勁啦！