前晚AC米蘭場主場煞科戰，睇見哥斯達古達（達叔）點樣串演中場、射入12碼作告別，到最後俾成班隊友拋起，場面都幾感人。不過當日唔係個個AC球員都開心，奧利華拉表現差勁，每次觸球都有球迷噓，難怪有網友講笑咁講，應該退休嘅唔係達叔，而係奧利華拉。
41歲嘅達叔喺呢場個人告別戰串演防中，係就冇班細嘅咁走得，但就冇乜甩漏；到下半場射入由哥古夫博到嘅12碼後，即刻被換走接受球迷起立歡呼。佢離場後，AC即刻又輸番粒，最終輸2:3。無相干啦，戰果次要，睇達叔個明星老婆哥隆巴莉同個仔艾基里全程喺場邊為自己打氣，班隊友賽後着晒佢件5號波衫、5萬幾人拍掌為佢送別，有咁嘅場面，夫復何求？
至於今季着起舒夫真高件7號波衫嘅奧利華拉，成季冇表現，連主場煞科戰都被球迷狂噓，佢全場射門7次得1次中框，其間換過對鞋一樣冇幫助。網友caven喺news.twonil.com.hk入面話：「退休嗰個應該係奧利華拉！」係就係誇張啲，但亦證明呢個26歲前鋒真係要檢討吓。當然，佢下季都未必在陣咯。