大陸炒股已陷瘋狂地步，無論打工仔抑或為人子女，做嘢同講嘢都要小心啲，唔係隨時俾人炒魷，甚至損害家庭和諧。
送被套 股票扮蟹
話說老細生日，幾位下屬諗住趁機拍吓馬屁。甲科長為人精明世故，早就打聽到老細鍾意炒股，於是揀咗一隻以牛做主題嘅工藝品送禮，老細見到，當然笑到見牙唔見眼喇。冇幾耐，甲科長就得到老細重用兼升職。相反，乙科長平日做嘢積極進取，處事頭頭是道，但做人就比較死板，連老細幾時生日都唔知。
喺一個好偶然嘅機會，乙科長知道老細就嚟生日，一心諗住送啲實際嘅禮物畀佢，咁啱正值換季，佢決定送床上用品，點知喺佢送「被套」嗰日，股市暴跌，老細手頭嘅股票當然全部「被套牢」（坐艇）。喺咁嘅情況，老細梗係唔高興，冇幾耐，乙科長被人以莫須有嘅罪名炒咗。
爹爹聲 唔跌就假
唔止打工仔要識避忌，做人仔女都要。見到老竇，咪以為賣口乖叫句爹哋，佢一定冧晒，遇啱老竇係散戶，咁就要小心啲。有個老竇唔畀仔女叫佢做「阿爹」，因為普通話「爹」嘅發音，同「跌」一樣，「爹爹」聲，對股民嚟講真係大吉利是，所以佢就叫仔女改口叫佢「兄長」（諧音「兇漲」，意味勁升）。
除咗稱呼有學問，父子間嘅親子活動都好重要，一齊睇NBA籃球賽，梗係捧公牛隊，灰熊隊就免問！帶仔女去動物園，任何熊類嘅動物當然唔使旨意會參觀，可惜牛普通咗啲，好少動物園會冇啦啦養幾隻牛嚟吸引觀眾入場囉！
http://big5.xinhuanet.com/gate/big5/forum.xinhuanet.com/detail.jsp?id=43009799
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]