今年開始實行室內全面禁煙，見老公成日騰出騰入去煲煙，至今已4個幾月，大大話話起碼騰咗幾萬次，身為老婆都覺得煩，既然食得咁辛苦，不如戒咗佢。但好多人戒唔到都係怕戒後變肥佬。我哋請教專業人士，原來只要堅守2大原則，戒煙唔會肥。
記者：梁學文
攝影：陳陶鈞
Model：Raymond、Karen、Shinco、Yuki@theGroup
原則一
療程省錢又省時
好多人只靠決心同意志，花3至6個月時間戒煙，不過唔少人又再食番。其實透過藥劑師的定期輔導，再加上合適的戒煙藥物，一般只需花8至10星期，甚至只用２星期便成功。藥劑師嚴生說：「一般人認為單憑意志就得，冇錯係有成功例子，不過失敗居多。其實醫生同藥劑師嘅角色真係好重要，可以提供專業的藥物，慢慢幫助戒煙人士脫癮。」一般來說，有醫生幫助，約２至3個月就可以成功。
坊間有很多藥房都提供免費的專業意見，不過藥物或戒煙產品就要另外收費。
3大戒煙最新產品
用藥物戒煙令煙民更快脫癮，且買戒煙產品的費用絕對比買煙少，以每日食1包煙的煙民來講，3個月買煙的錢約$2,700，不過用戒煙產品只需$1,900，差唔多慳到三分一。
Nicorette戒煙貼$180-$228
對象：長期需要尼古丁的煙民。
優點：戒煙貼的優點是可以24個小時都貼住，持續發放尼古丁，且可貼在背脊或隱蔽地方，唔會妨礙日常生活。
缺點：皮膚容易敏感的話就不適用。
Nicorette戒煙煙嘴$112
對象：手癮比較大的煙民，即一定要有煙揸手的。
優點：感覺好似吸煙，同樣有煙嘴同尼古丁，手癮一到就拿出來吸吸。
缺點：價錢比戒煙貼或香口膠貴。
Nicorette戒煙香口膠$39
對象：口癮較深的煙民，即是針對口中一定要有東西的煙民。
優點：口癮一到，食1粒即刻可以治到煙癮。
缺點：好易變成香口膠，煙民食得快，易用錯方法，因而中尼古丁毒。
原則二
靠家人支持提醒
雖然有戒煙產品，不過家人支持一樣好重要，尤其喺日常生活要互相提醒。戒煙一定要讓家人同身邊的朋友知道，成功率定會大增。
1.叫屋企人提醒
一想食或者一拿起包煙，家人就要提一提，拉衫尾或拍一拍都可以，目的是提醒佢戒煙。
2.收埋煙仔
最緊要收埋啲煙，冇咁易搵到及食到。
3.做運動代吸煙
家人多啲陪戒煙者，做運動或傾偈都有助戒煙。
用家實例
所用方法：戒煙貼
謝天華只用了5星期就成功，他話：「戒煙嘅決心好重要，加上藥劑師提供嘅服務和藥物輔助可以度身訂做個人化嘅戒煙方法，令我可輕鬆戒煙。5星期內我漸漸減少吸煙數量，且冇肥過。我太太亦用盡方法威逼利誘幫我減退心癮。」太太的支持令謝天華可以在5星期內成功戒煙，絕對是最佳「療法」。
所用方法：戒煙貼
陳生話最緊要是家人支持，產品都是輔助，冇太太同家人支持都戒唔到。陳太話：「老公肯決心戒煙，我同仔女都會盡一分力助他完成戒煙療程，成功後都唔覺佢肥咗好多，咁對身體有雙重健康！」
模特兒們有意見
採訪當日找來幾位模特兒影相，與他們閒談間也發覺身邊的親人也是煙民，對戒煙也有不同的見解及解決方法，可參考他們的意見。
Raymond
我以前都食煙，後來全靠多做運動先可以戒得甩。
Karen
我唔鍾意啲人食煙，所以一見到老公食就會喝止。
Shinco
我老竇係煙民，細細個已見佢食煙，我試過收埋晒啲煙，覺得係最好方法。
Yuki
我會抽時間陪爹哋做運動。
一戒煙即肥？
好多煙民一聽戒煙就即刻耍手又擰頭，因為擔心戒了後會變肥，連鄭秀文（Sammi）都話戒煙後體重上升了。無錯！戒煙後好易肥，原因好簡單，就是胃口好了，屈臣氏高級藥劑師（藥物資訊）嚴子閣話：「好多人戒煙後都會肥，因為胃口好咗，食慾增強，食多咗自然會肥啲。不過如果有好嘅療程同醫生指導，就唔會有問題。」
自卑自大會失敗
聽嚴子閣講咗成功的戒煙例子，我唔相信所有人都一定成功，所以要問佢有冇遇過失敗的例子：「我當然遇過失敗例子啦！其實用產品都唔一定戒得甩，尤其是由家人幫戒煙者搵醫生問意見的話，多數失敗，因為戒煙者唔敢面對醫生或有種自大心態，無論產品有多厲害都會失敗。所以就算有醫生意見及家人支持，還要改善戒煙者的心態。」
查詢：31693333