時裝影展，靚人靚衫靚相，要幾型有幾型，可惜多睇會厭。一改口味，主角換做流浪貓狗，再配合photoprinttee作愛的教育，包保少見。專替歌星如陳奕迅、Twins等拍攝唱片封面的土炮攝影師SunnyLau，聯同本地時裝品牌Dusty在屯門市廣場舉辦名為「Whatasunnyday得寵時尚」的攝影展。就連森美小儀都有到場打氣，小儀更帶同寶貝DeeDee，一齊宣揚愛的信息。
記者︰陸俊雄
攝影︰楊錦文
常帶「缺憾」小儀出街
「好似小儀，身體有缺憾（生得矮），我都一樣好愛護佢，仲成日帶佢出街見人。」經常取笑阮小儀的森美，其實想帶出不論貓狗有甚麼殘缺，都唔應該遺棄佢哋︰「我養嗰隻西施今年9歲，對於狗隻嚟講已經好老，老到唔認得我，但我一樣好照顧佢。」至於小儀更身體力行，帶同心愛小狗DeeDee出席影展開幕禮︰「DeeDee已經3歲。我同一般少女一樣，細個冇時間冇空間養寵物，到大個覺得真係負擔得起至決定養。」養寵物三思而後行，香港又有幾多主人唔係貪新鮮玩認真？
入錄音室影狗
有瀏覽過小儀網上日誌都知道，DeeDee經常出現，可見寵愛有加。SunnyLau正正欣賞小儀與DeeDee的「人狗情」，於是邀請佢做相展嘉賓。還有，將在6月初出版的第二期寵物雜誌《SEASONAnimalia》中，更以DeeDee做封面。「我知小儀鍾意帶狗返工，於是有日我走入錄音室，即場幫DeeDee影相。」攝影師崇尚自然，可能咁先可以表現到寵物與主人間最真實的一面。
重視寵物與人的感情
這個攝影展以流浪貓狗為題材，Sunny坦言並非一早有計劃去做︰「我到不同國家、不同地方影相時，每當睇見流浪貓狗就好有感覺，好自然影低佢哋，所以相片來自好多地方，連羊都有，喺菲律賓影嘅。」他亦指，在日本愛護寵物可以好潮，賣貓狗的地方裝修好靚，就連寵物用的accessories都可以同人好配合，所以香港應該學習日本人尊重寵物。「我好重視寵物同人之間的關係，所以我特別鍾意有對公公婆婆收留好多流浪狗嗰張相：寵物依賴主人，但老人家一樣依賴貓狗。」
出Tee宣揚信息
對於愛護寵物的意識，Sunny直言香港並唔強烈，所以想藉相展，當中包括五個寵物故事如「何家小貓何家猜」、「羊群心理效應」等，喚醒參觀人士認真對待寵物。「若想更多人意識呢個問題，單靠一個相展、一本寵物雜誌係唔夠，所以我聯同Dusty，將相片同slogan印喺衫上面，着住出街就可以畀更多人睇到，藉以宣揚呢個信息。」
分店派邀請卡
Dusty為呢個有意義的攝影展，特意推出四件photoprinttee，男女裝各兩件。Dusty主腦之一的阿Paul話︰「Dusty第一次咁乖！之前同過外國artist、攝影師合作搞相展，不過以關懷流浪貓狗做主題係第一次。」唔講唔知，原來Dusty成班幕後主腦和Sunny自細就認識，住同一屋邨長大，見過唔少流浪貓狗。當阿Paul三個月前知道Sunny本《SEASONAnimalia》第二期快將推出時，便主動搵老朋友大玩交叉，試做一個全屬於香港人的攝影展，提醒香港人不要隨便遺棄寵物。
攝影展位於屯門，遠就遠啲，去唔到的朋友仲有另一途徑，就係到Dusty各分店，每位顧客會獲派相展邀請卡，正面全部係SunnyLau影的貓狗相，咁咪可以望梅止渴囉！
女裝tee$220
男裝tee$250
展覽詳情
日期︰即日至6月3日
時間︰11:00am-10:00pm
地點︰屯門市廣場3樓C區間（近運動家及ETE）
查詢︰31656611