所謂「一樣米養百樣人」，查實一樣人亦食百樣米；生活喺香港好幸福，乜嘢米都食得到。白白滑滑嘅白米固然係主糧；紅米、糙米呢啲營養價值較高卻較難入口的亦不虞匱乏；至於可愛嘅珍珠米、粘膩嘅糯米，都係想食就有。咁多款米，食法自然多籮籮，今日講吓點整米飯啦！
記者：林佩婷
攝影：陳陶鈞
參考食譜：《飯》郭美寶編著萬里機構．飲食天地出版社
蛋包素炒飯
需時：20分鐘（未計煲飯時間）
價錢：$20/4人
材料：雞蛋2隻（拂勻）、紅米飯2碗、雜豆3湯匙、本菇50克（去尾）、青/紅/黃甜椒各1/2個（切粒）、茄汁1湯匙、蒜茸1茶匙、油5湯匙、白酒少許
調味：鹽/糖各1/2茶匙、鮮露2茶匙、胡椒粉適量
做法：雜豆洗淨汆水；落2湯匙油燒熱鑊，炒香蒜茸，加入三色椒粒/本菇快手炒勻，灒白酒撈起。落1湯匙油炒飯，加入三色椒粒/雜豆/本菇，落調味/茄汁炒勻撈起。落2湯匙油燒熱鑊，將蛋汁煎成薄皮蓋飯面上便成。
貼士：單食紅米或糙米嚡口亦難消化，必須溝白米來煮，比例約為1份紅米或糙米對5份白米。
粢飯
需時：20分鐘（未計浸糯米/榨菜時間）
價錢：$15/4人
材料：糯米450克（浸1至2小時）、肉鬆150克、台式榨菜100克（浸2小時切粒）、油炸鬼2至3條（切段）、水少許
做法：糯米浸後瀝亁，放入鋪上白布的蒸籠大火蒸8至10分鐘，其間須翻動1次及灑上水。將保鮮紙鋪壽司蓆上，放上糯米壓平，依次序放上肉鬆/榨菜粒/油炸鬼/榨菜粒/肉鬆/糯米飯，隔保鮮紙將糯米壓成長條狀。
香煎銀鱈魚伴日式咖喱飯
需時：30分鐘
價錢：$60/2人
材料：銀鱈魚500克、白飯4碗、香蒜茸適量、生粉少許、橄欖油1湯匙
醃料：鹽1/2茶匙、胡椒碎少許、白酒1湯匙
日式咖喱汁：日式咖喱1盒、水4杯、薯仔1個（煮熟去皮切粒）、車厘茄100克（開半）、紅椒1/2隻（切角略炒）
做法：銀鱈魚去鱗以醃料略醃，撲上生粉。燒熱橄欖油，煎銀鱈魚至金黃。日式咖喱/水開勻煮滾，加薯仔煮10分鐘，放紅椒/車厘茄拌勻上碟。最後將白飯銀鱈魚上碟，淋日式咖喱汁，撒上香蒜茸即成。
貼士：可以紅米飯代白飯，更加健康。
鮑魚雞絲粥
需時：21/2小時
價錢：$200/4人
材料：急凍鮑魚300克（解凍）、光雞1隻（拆骨起肉，雞骨汆水）、白米/珍珠米各1米杯、水5公升、鹽/芫荽段/葱絲/薑絲各適量、油1湯匙
做法：白米/珍珠米加水/油浸20分鐘後瀝亁。水煲滾，落白米/珍珠米/鮑魚/雞骨煲12小時。撈走雞骨，放入雞肉煲11/2分鐘，取出雞肉/鮑魚，雞肉撕絲、鮑魚切片；粥底落鹽/芫荽段/葱絲/薑絲，食用時放回鮑魚/雞絲。
貼士：白米爽口，珍珠米較綿，溝埋煲粥好夾。
幼兒不宜食糙米
好多人都知白米的營養價值沒糙米、紅米等來得高，柯文滿指出因為市面上出售的白米，為達到潔白的目的，將穀粒經過多次打磨，穀皮、胚芽這些珍貴的營養部份在打磨過程中去掉，只餘下沒有生命力的胚乳部份。相對地，糙米所含的各種營養成份特別是維他命B、E及纖維素都較白米豐富得多，如糙米、紅米等所含纖維素就高過白米4至5倍。
不過，要留意的是，糙米、紅米因含豐富的纖維，比較難消化；柯文滿提議2歲以下的幼兒、有消化困難及營養不良者，都不宜食用。
