即將成立的國家外滙投資公司宣布斥資30億美元購入即將上市的Blackstone少於一成股權，成為該公司第一筆投資。第一筆投資就是以200億港元計的資金投入私募基金，可以想像，日後的其他投資也不會太過保守。𠵱家中國外儲有過萬億美元，假如有小量流入香港股票市場，已經不得了。
事實上，參考新加坡投資公司，其投資在香港股票市場也相當積極進取，往往能夠投資於一些未被發掘嘅股仔身上，假如市場炒定國家外投公司買港股，也許不難解釋近期一些「化石股」，何以忽然當炒。最明顯一個例子，是在國內具領導地位的中國燃氣（384），一係就成年都唔炒，一炒就90度角飆升。
噚日推介嘅晨訊科技（2000）以近全日高位報收，走勢唔錯，另一隻曾經推介過嘅炒復蘇工業股可以留意番大昌微線（567），整固咗幾日之後噚日初現陽燭升破旗形，有機再展升浪。公司早前宣佈與日本主要股東及線路板製造商大昌電子株式會社建立策略性聯盟，未來3年提供分別1.32億、1.58億及1.9億元定單，以其日本母公司背景，大昌微線的生產技術應有能力攞到更多大企業定單。
蒙古能源又有收購
蒙古能源（276）上月完成收購一幅3.4萬公頃之採礦區後，上星期出咗份通告再披露訂立意向書收購多一幅3.2萬公頃之礦區，名義代價為1美元。3.4萬公頃有幾大？約莫係香港特區1/3面積，換句話講，兩幅礦區總面積約有2/3香港特區咁大，其他轉型礦股望塵莫及。通告又話正商討若干煤炭分銷商機，為下一單好消息埋下伏線。