英超、德甲煞科後，波迷焦點去晒西甲度，意甲繼續冇乜人理。撇開意
甲一早由國際米蘭封王，其實戰況都幾激，前日有好幾場大手交易。睇近兩季嘅入球率，原來意甲仲高過英超同西甲，呢個「悶蛋」聯賽，其實未至於無嘢睇啫。
前日比賽，里賈納半場落後3球迫和安玻里3:3，簡直係前年歐聯利物浦對AC米蘭嘅翻版，而墨西拿明明已經降班，仲可以落後兩球追和費倫天拿2:2。好嘞，講到托廸嘅羅馬，無嘢爭亦同卡利亞里上演場激戰，輸2:3。係，羅馬係無嘢爭，但「王子」有，呢場佢入兩球後累積24球（亦係佢職業生涯第200個入波），仲有機會問鼎歐洲金靴獎㗎。
意甲「入球騷」唔係偶一為之，上季，意甲平均每場入2.61球，多過英超（2.48球）、西甲（2.46）；今季，意甲亦以2.51球領先（英超、西甲分別係2.45球、2.37球），邊個話意甲隊只係識守？
意甲下輪煞科，理論上仲有8隊波有機會成為最後一支降班球隊，真係幾激㗎。講到呢度，最開心可能係「收費台」，話晒意甲係佢哋未來嘅主打賽事嘛！