港交所上市委員會又到一年一度換屆嘅時候，今次五出五入，唔連任嘅包括已退任希慎興業董事總經理嘅利子厚、最近由花旗過檔滙豐出任亞太區環球銀行主管嘅范浩宏、安永會計師事務所中國區主席孫德基，以及兩個只係做咗一年嘅「新丁」：保誠資產管理嘅張正樑，及私募基金華平嘅孫強。
喺唔再撈嘅名單中，以利子厚最怪，佢只做咗三年，照計仲可以繼續服務，而且佢上月唔做希慎嘅時候，話自己為咗追求個人目標，包括要參與公職事務，所以唔做希慎，但今次唔做金融界嘅公職，確實有啲耐人尋味。
至於只係一年貨仔嘅張正樑，本身係年輕專業人士組成嘅論政組織「三十會」成員，佢因天星鐘樓清拆事件而獲委入古物諮詢委員會，唔知係咪因為咁，唔得閒再參與上市委員會工作。
中遠洋黃天祐替入
新加入嘅委員就包括：可能係代替孫德基嘅安永中國合夥人吳繼龍、近年多次代表財經分析師學會去立法會表達意見嘅CFA蘇德成（JamesSoutar）、華富嘉洛企業融資董事總經理魏永達（RichardWinter）、中遠太平洋董事副總經理黃天祐，同埋創業及私募投資協會主席陳鎮洪。
[email protected]