02年攞咗奧斯卡最佳動畫獎，香港人許誠毅嚇儍了香港人，身為《史力加》的動畫總監，04年的第2集再以9億美元橫掃全球票房，成當年全球總冠軍。乘着《史力加3》下月上映，已榮升為聯合導演的許誠毅，從矽谷還鄉返屋企探阿媽，途中卻遇上要證明佢就係怪獸史力加真人版的記者，結果說說食鳳爪、白糖糕就笑足1小時，其人之幽默抵死，果然是史匹堡旗下最佳打工仔。
記者：馮敏兒
攝影：楊錦文、馮敏兒
故事大綱
史力加與費安娜公主本來在沼澤過着幸福快樂的生活，點知國王突然病重，臨危受命要繼任，史力加為「卸責」急call遠房親戚阿瑟王子頂檔。卻遇上密謀叛變的魅力王子……連環圖為《史力加3》中BB嘔吐的特技效果，是電腦動畫的里程碑，從草稿到完成，電腦效果、概念層層相加，非常過癮。
幾百億身價話事人
史力加條命值成幾百億，但史匹堡仍然將史力加交畀許誠毅照顧。「佢出世唔關我事，生死大事亦不由我作主，但佢大個就關我事，我負責掃風、餵奶，不過換片就唔識！」世上只有許誠毅最明白史力加：「只要我話呢個唔係史力加，大家都會信晒我，我可以決定佢點做戲。」甚至史力加個表情得唔得，老闆都要請教：「Raman你點睇！」史力加有今日咁嘅性格，可以話大部份是許誠毅一手造成，所以如果史力加有朝一日做壞事，就一定關佢事喇！
史力加是中國人？
耳仔長得像小喇叭的怪獸史力加，原出自已故繪本畫家WilliamSteig的手筆，原著插畫書僅30頁，寫於幾十年前，講佢同爸爸媽媽出街撞到隻驢仔，見到個好醜樣嘅公主就娶佢。許誠毅描述這種Ogre精靈類似小矮人，在歐美都有傳說，「專食埋晒啲好奇怪食物，例如魚眼、豬耳……其實史力加嘅食物同我哋冇乜分別，都係中國人亦係我最鍾意嘅食物，但我啲美國同事去茶樓見到個女人整個魚頭連魚眼一齊食，就會覺得歎為觀止，佢哋最鍾意就係叫我表演食鳳爪。飲中國喜宴見到連雞頭一齊上，全枱冇人敢食，有個同事還拿了雞頭回家，嚇自己個仔。白糖糕唔係食物，而係飛擲磁貼，飛向雪櫃門，考佢黏貼力……」一切所謂「奇行怪習」不正就是電影中所面對的世界嗎？
「我們每個人都有少少似史力加！」但許誠毅的性格還是實在太似史力加了，他89年去美國，到了第4年才開始能融入那個國際大家庭，他自閉，連與同事談話也不敢，就像怪物一樣，與周圍的人格格不入，他見工時，接見他的人冇一個聽明白他的英語，只是手底一大叠畫稿勝過千言萬語，但英語一直是個問題，直至某一刻：「偶然第一次發現自己發夢講英文，嘩興奮到吖！」
工作瞓覺再工作 私生活24小時
問佢私生活，「講咗會俾公司鬧！同事都唔知，因為連我自己都唔知！」許誠毅就是這樣一個超級打工仔。但動畫是門自閉行業，在畫枱和電腦前度過漫長的歲月，許誠毅卻經歷了超過18年，怎可能？究竟他的矽谷生涯是怎樣？答案竟是──
「7:30am至7:45am起床，踏正8:25am出門，從三藩市駕車到矽谷9:15am踏入公司，那時枱面就有1張紙條，除了中間有1小時食飯、睇電郵，每日行程就咁full晒，直到7:30pm至8:00pm放工，有時返屋企仲要畫storyboard，由8:30pm一邊睇電視一邊畫到11:00pm，午夜12時準時入睡。」堂堂大導演、動畫總監到現在還要親自下廚，返屋企都要做？許誠毅說自己同最夾band的剪接師MikeAndrews工作完後，當晚就會返屋企畫好故事草圖，因為佢連交代手下做都慳番，世上最有成效的熟手技工還是他。同史提芬‧史匹堡第一次握手到現在都超過10年了，為他賺了過百億，但佢話自己不過快啲供完層樓，人工同香港大學一個教授差不多，但就冇佢哋咁多福利！
還是香港夢 我要攞金像獎
許誠毅公仔畫得靚其次，佢最掂是觀察入微，對人們生活的細節掌握細緻，他的金句是：一定要看detail，不但是荷李活精神，做動畫精神，可做導演唔同畫公仔：「現在我知道講古仔timing好重要，何時讓觀眾知道某些事也好重要，咁先會令觀眾更投入，如果所有嘢都俾觀眾估到，那又會變得唔respect觀眾！當你們睇《史力加3》的時候就知道我講古仔講得幾好！你知道如果在主角對話時，出現正常情況根本不會出現的內容，就是敗筆。」當電腦可以把過去你要兩個月才做到的以兩小時搞掂之際，也正正是許誠毅大顯身手之時，《史力加3》啲頭髮、服裝就靚到之前冇人信，完全體驗他對detail的執迷。
越搞越出神入化，會唔會又拿多次奧斯卡動畫獎？唔係，應該是最佳導演獎，或者最佳電影獎，佢話：「都已經給你攞過動畫獎，又點會再畀個最佳導演獎你！不大可能吧！」難道你冇夢想，點樣在「夢工場」做㗎？「我的夢是廣東夢，我最想攞香港電影金像獎，但佢冇最佳動畫獎喎！」
《史力加3》用上了超高速電腦製作，設計了3,500件衫，連鼻上毛孔都見埋，面部表情份外抵死。此幕兩夫婦要繼位，這兩套精細絕倫的靚衫更用全新技術發明，前兩集望塵莫及！
許誠毅小傳
許誠毅在九龍聖若瑟中學求學時期沉默寡言，同學踢足球、看電影、野外露營等活動，他一概沒有參與。1984年畢業於香港理工學院，同年憑《翅膀》獲得香港獨立短片展最佳動畫，在香港動畫廣告界做了幾年，1989年往加拿大動畫學院SheridanCollege上了一個為期3個月的暑期電腦動畫課程。後加入美國的動畫公司PacificDataImages（PDI）做動畫師。同時又自己製作動畫《SleepyGuy》，1994年憑此片奪多項國際動畫大獎。不久，史提芬‧史匹堡收購PDI，製作大型動畫，許誠毅更在《蟻哥正傳》和《史力加》之中，擔任動畫總監一職。
