曾幾何時，日本波深受萬千香港球迷愛戴，小弟仲記得讀中學時，有一位深愛日本文化的波友，經常同大家分享日本足球聯賽。當年嘅感覺，只係覺得日本人好團結，好有錢，好有組織能力，好投入自己嘅足球！
其實，如果冇咗4大聯賽，我諗我都會睇日本波，總好過中國波！有人講過，球場上，慶祝進球嘅時候，非洲球員會載歌載舞；歐洲球會就會打觔斗；日韓球員就會叠羅漢，至於中國球員，佢哋只會諗我哋幾時會失波呢！中國球迷永遠係失落嘅一群！
呢個星期，日本舉行聯賽盃，從往績分析，有幾隊波大家真係要留意，廣島三箭、清水心跳、鹿島鹿角同埋神戶勝利船。佢哋喺聯賽方面嘅表演都幾好。另外，睇番積分榜，因為除左甲府風林肯定出線8強之外，其他球隊都仲要搏，大家要留意！講戰績，我就鍾意鹿島鹿角，呢隊上年嘅「阿2」，聯賽表現極佳，4次聯賽冠軍、聯賽盃又攞過3次，所以我對佢哋好有信心！
周鵬
商業1台《球迷集中贏》主持
電郵：[email protected]