日本有豐田、韓國有現代、德國有福士，咁中國有啲乜呢？答案係奇瑞。
奇瑞係安徽省蕪湖市嘅一間車廠，成立只有短短10年，但去年已賣出第30萬部汽車，雖然早期常被外國廠商投訴佢抄襲人哋嘅設計，不過佢依然係大陸成長得最快嘅汽車生產商，預計今年嘅增長會達到30%嘅驚人數字；咁仲唔止，佢家鄉蕪湖市亦對佢大力支持，市內嘅的士一律全部改用奇瑞出品㖭！
雖然奇瑞勢頭咁好，不過唔少人都認為中國嘅汽車工業近幾十年先至起步，製造技術落後外國好多，所以好難鬥；我悠穎馳都覺得呢段路其實唔容易行，因為唔少外國車廠都已經喺中國設廠嚟降低成本，奇瑞除咗技術未夠人強外，價格亦未必有優勢，嚟緊嘅挑戰一啲都唔少。但無論如何，難得中國可以有一間具代表性嘅車廠誕生，可以嘅話，身為中國人都應該要支持吓！
悠穎馳
豪邁不羈，愛車如命，聽幾下引擎聲就知咩車！