齋睇中意控股呢個名，確實令人有好多美麗嘅誤會，以為係搞貿易業務，點都諗唔到係家具產銷，而且佢哋嘅「皇朝傢俬」，經已喺內地扎根十幾年，05年開始仲起用藝人關之琳拍廣告，喺央視同鳳凰衛視狂播，今年3月攞埋08年奧運家具嘅獨家供應權，認真威威！
四隻「寶」每月使費8000蚊
華華日前去中意喺廣州增城嘅新廠參觀，點知未睇廠先睇馬，原來老闆謝錦鵬喺廠房一邊搭咗個馬廐，養咗四匹澳洲退役靚馬，有晒名畀你叫──Opal、Rambo、Abel同Mable，真係多「寶」。
謝生話，攞呢幾隻馬返嚟一毫子都唔使，每月養馬亦只係8000蚊人仔，養喺度等啲嚟攞傢俬嘅分銷商有一種悠閒高檔嘅感覺，自己間唔中又可以騎吓，身體都健康啲。
華華用紅蘿蔔餵馬仔，點知馬仔好熱情，吃完識點頭多謝。之不過，謝生就潑冷水話，狗仔為主人而死，馬就睬你都儍，只顧向前直奔，諗吓每次墮馬意外就知喎。
[email protected]