講《中大學生報》情色版，梁文道講到哈佛耶魯，大讚人哋水平高。呢個當然，人哋美國整個學術社會嘅水平非常高，冇教授做即食麵專家，乜問題都可以評論一餐；冇學生攬住學生會唔放，為學生會工作搞到成績低下；冇主流報紙為咗一間大學嘅學生色情或情色活動，日日以好大篇幅報道；冇大學學生報以炮製情色版而沾沾自喜，人哋嘅學生報係校園日報，每日出版，講嘅係學校要聞。一句講晒，香港係差一皮，即使去年嘅IPO生意，香港已超過紐約。
差一皮嘅主要理由係大家少讀書，唔似得梁文道。（有人話梁文道係一九九○年以來睇書最多嘅中大畢業生，梁文道只係畢業十幾年啫。）以前崇基學院有四年基本綜合課程，讀研究方法，讀中國文化，讀西方哲學等等，學生得益良多，但中大被逼改為三年制之後，學生已冇時間修讀咁多科咯。前幾日新聞話哈佛大學推出八門全新通識教育課程，學生須修讀倫理、數學、生命科學、物理科學、美國與世界等等，其實冇乜新奇，哥倫比亞大學、芝加哥大學等已經有之，問吓袁天凡就知道芝加哥大學嘅通識教育要求幾咁高，到今日袁天凡仲記得但丁詩篇。
不過香港大學生未必願意讀通識啫。左丁山知道有一位入咗大學嘅女生，竟然退學，佢話大學一年級太多通識，冇教佢專科，於是佢覺得嘥時間，退學唔讀，左丁山都唔知點樣勸佢，唉吔，如果佢去美國再讀大學，通識課程仲多啦。
大編輯話：「一啲香港嘅大學通識課程只係讀科『旺角文化研究』、『從CantonPop歌詞研究香港社會』呢一類。我個姨甥女六月畢業，我過去參加芝大畢業禮，佢讀咗兩年芝大通識，包括柏拉圖、蘇格拉底，以至文藝復興、現代文學，科科硬嘢，讀本本書都係西方經典，如果叫我哋啲大學生讀，佢哋會情願去旺角搞研究考察。」香港人、香港學生弊在過份功利，喜歡讀專科，讀流行科目，呢樣偏好，幾難扭轉。