平時最鍾意走出嚟出風頭嘅電視台高層「大帝」，關仁聽聞佢表面大豪客，其實份人好縮骨，特別對員工，聽講好刻薄吓。
大帝為咗喺傳媒面前營造佢豪氣形象，成日扮晒大豪客闊佬請飲請食，不過關仁有個朋友曾經係佢嘅員工，就爆咗佢啲小家嘢出嚟。
大帝以前開咗間公司，冇打卡制度，不過大帝又怕自己有時應酬遲返，班員工會作反，所以佢就諗咗條絕世好橋，要員工輪流幫佢辦公室嘅神位裝香，於是佢就憑支香燒咗幾多，嚟估計員工嗰日到底有冇遲到，然後發現員工遲到就鬧到人狗血淋頭。
關仁覺得大帝呢招真係好鬼啜核，唔知係咪佢以前拍得武俠片多，佢對用香計時呢家嘢好有研究，所以諗埋呢啲死橋去對付遲到嘅員工。
Textby關仁