若嫌近日晚晚鮑魚送飯太滯，鄧萃雯可以給大家另類選擇──來個屋邨師奶撚手小炒，再煲個老戲骨湯，相信同樣叫觀眾津津有味。不論《溏心風暴》還是《師奶兵團》，這兩套劇集已打破了年輕偶像孭飛局面，確認了老戲骨的存在價值，大契李司棋和細契關菊英等一班老戲骨的成功，令鄧萃雯深感欣慰：「佢哋應該受到重視。」 撰文：戴彩煥
鄧萃雯率領的《師奶兵團》上周殺到，今次雯女由《女人唔易做》的女強人變身《師奶兵團》的屋邨師奶，與《師》劇的葉童和商天娥兩位好戲之人鬥演技，適逢《溏心風暴》近日全城熱爆，刮起一股老戲骨旋風，一班老戲骨的精湛演技，不但讓觀眾看得熱血沸騰，更引證薑是老的辣這個道理。
指新人太過錫身
眼見實力派抬頭，觀眾不再盲目捧偶像，鄧萃雯坦言深感欣慰，她日前接受訪問時說：「有日喺化妝間見到《溏心風暴》張海報，都幾欣慰、幾開心，因為張海報係司棋姐、夏雨、米雪同關菊英喺中間，其他嗰啲公司捧緊嘅就喺側邊，我唔知咁係咪實力派抬頭，起碼公平啲，佢哋係做到嘢，係部劇嘅支柱、靈魂，佢哋應該受到重視。
「我哋嗰代好聽話好乖，公司畀乜我哋都做，又勤力、又唔詐型，唔敢請假，替身都唔敢用，即使有好多機會都好，大家都好搏命，但𠵱家啲人就錫身好多，郁啲就『冧』廠，好多嘢為咗自己而唔肯做！」
演戲跟選美其實是兩碼子的事，偏偏今日一班電視台花旦，十居其九也是選美出身，一選出來還未明白甚麼叫演戲，已被力捧孭飛，又難怪「熬」不出戲味，雯女對此笑道：「黃秋生成日話唱歌嘅點解成日走出嚟拍戲囉！我覺得成個制度令件事變成咁，都唔怪得班年輕人，佢哋遇到嘅壓力，其實比我哋仲大，以前我哋肯刻苦耐勞、肯聽教聽話，你都仲可以保住個位，但𠵱家得就得，唔得就拜拜！肥啲呀？唔得！或者今期唔興你咁嘅style、唔入屋，即刻拜拜，淘汰速度好快，同埋成日飛紙仔，我哋個年代仲好啲，冇飛紙仔，你好多嘢要鑽研㗎嘛！
「我哋第一部劇做得唔好，都仲有第二部、第三部去試吓，進步係好慢，但都仲有個機會喺度，但佢哋冇，兩三次唔得已經格殺令拜拜。根本成個制度都有問題，有時唔係個導演唔想指導演員，一來個導演未必識，二來佢都冇時間。你話一個新人，佢都仲可以教到你，套套劇5、6個新人，邊度教到咁多？教到一日、一個禮拜，到第8日，佢都要拍嘢㗎，唔通寫報告話為咗教你搞到延誤拍攝進度咩？佢始終要孭鑊。𠵱家連拍攝時間都咁緊迫，再加上連導演都冇乜栽培，基本上成個制度冇培育呢part，連導演都冇培育過，點去教演員，佢又點識去教呢？」
松哥樂於教後輩
雯女表示新人若有機會跟一些樂於指導別人的前輩合作，已算十分幸運，例如劉松仁便經常教導後輩，她說：「松哥希望成場戲都好，所以必須話你聽，分析你知應該點做，佢認為嗰場戲大家都做到先至係一場戲。松哥喺《歲月風雲》雖然唔係同我好多同場，但佢教咗我好多演戲同人生道理同埋點樣協助對手。有時我都會好𤷪，覺得𠵱家啲年輕演員唔係好投入，唔係好用心，松哥都有話我聽，唔怪得佢哋，佢哋出身都冇好好培育過，佢哋出道到𠵱家，見過幾多好劇本？莫講話好，連齊嘅劇本都未見過，你叫佢哋點識做功課？我聽完之後，覺得真係唔可以怪佢哋。」
攝影：林德雄
髮型：KelFung
