上個月喺紅館舉行咗兩場「麗的亞視半世紀精采演唱會」，有線高層徐小明雖然離開咗亞視好多年，不過佢當晚都應邀做壓軸嘉賓，小明哥仲專程喺廣州請咗武術學員嚟香港同佢即場切磋，一邊耍功夫一邊唱歌，現場觀眾反應唔錯，第二場散場後，仲有一大班師奶fans喺紅館後門等小明哥出嚟握手，場面都幾墟冚。
賀入行50年
據知演唱會搞手張耀榮喺現場見到小明哥咁受歡迎，即時打蛇隨棍上請佢出年開演唱會，後生一輩嘅觀眾可能唔知，小明哥係童星出生，做過幕前又做過歌星出過唱片，當年都幾紅吓。記者就開演唱會一事致電小明哥，佢承認出年有開演唱會嘅計劃，佢話：「張生（張耀榮）提議我出年開演唱會，咁啱出年係我入行50周年，我都想做番啲有意義嘅嘢，暫定係4月或者5月，開兩場，仲有成年時間籌備，我有信心一定唔會令歌迷失望。」
