經過頭兩集《魔盜王》之後，作為荷李活巨製嘅第三集《加勒比海盜：魔盜王終極之戰》（PiratesOfTheCaribbean:AtWorld'sEnd）絕對令人期待。一來我哋可以知道主角尊尼狄普（JohnnyDepp）點樣由世界盡頭執番條命仔重返人間，二來可以睇到我哋嘅發哥周潤發點樣以古靈精怪亦正亦邪嘅海盜look搶鏡，仲有睇吓女主角姬拉麗莉（KeiraKnightley）究竟係咪一隻狐狸精，連發哥都迷暈埋，要為佢犧牲命仔！套片成三個鐘咁多嘢睇，一定唔會悶死人！ 撰文：戶川淳
本周四（24日）上映嘅《魔盜王》系列嚟到第三集《加勒比海盜：魔盜王終極之戰》，片長兩個鐘頭五十分鐘，真係拍得住史詩式巨片。作為一套合家歡娛樂片，套戲咁長，劇情唔夠豐富緊湊，唔夠笑料動作場面同娛樂性，真係點揮低《蜘蛛俠3》（Spider-Man3）票房呀？
特技笑料加碼
大家老定，監製話今次套片內容、角色、特技同笑料都大加碼，就係要令觀眾置身前所未有嘅海盜世界，所以玩到去世界盡頭，仲喺大堆頭娛樂之餘，講吓人性同道理，從原本各懷鬼胎嘅角色反映人性內心掙扎同最美好一面喎！
有睇上集嘅朋友，都好想知道由尊尼狄普飾演嘅船長積克俾海魔吞噬後會點，原來佢俾鬼船長困咗喺世界盡頭，身為老友嘅奧蘭多布魯（OrlandoBloom）同姬拉麗莉自然要想辦法拯救好友，佢哋不惜請求積克嘅死對頭布沙船長出手相助，焦點當然係去到新加坡，從周潤發扮演嘅嘯風船長手上取得「地極航海圖」，闖入世界盡頭救番積克。
積克父子重聚
無惡不作嘅發哥最初同姬拉勢成水火，但佢後來點樣愛上姬拉仲甘願犧牲自己，臨死前仲將頸鏈同船長之位傳畀佢，真係令人期待。不得不提嘅係，今集以幾位男配角最有噱頭，發哥嘅嘯風船長不在話下，曾喺第一集出現、由謝菲路殊（GeoffreyRush）扮演嘅布沙船長亦會再次現身。
另一驚喜，就係積克船長嘅父親Teague會喺本集現身，扮演此角嘅係滾石樂隊（TheRollingStones）結他手KeithRichards。眾所周知尊尼個海盜形象係受Keith所啓發，今集佢哋終於可以碰頭喇！
場景小八卦：6呎鹽層拍戲
《加勒比海盜：魔盜王終極之戰》製作費高達2億美元（約15.6億港元），直迫《蜘蛛俠3》嘅2.58億美元（約20億港元）成本，套片仲喺13個地方取景，原來片中發哥身處嘅18世紀新加坡，係喺加州環球片場廠景加巴哈馬外景兩地拍攝而成。
上山下海
一班演員除咗要去巴哈馬同加州Guadalupe沙漠拍外景之外，仲去到猶他州鹽湖城有個叫做BonnevilleSaltFlats嘅著名自然生態區拍攝，嗰度係一個面積約400平方公里、地上鋪有大概6呎厚、由鹽組成嘅平地，聽聞嗰度原本係一個好大嘅湖，由於湖水早已亁涸，一層層嘅鹽聚積喺上面，估唔到《魔盜王》都喺嗰度拍嘢，效果係點？到時喺戲院要睇清楚喇。