從皇上寵妃到女強人，再到近日的屋邨師奶，鄧萃雯演過無數類型角色，有過數之不盡的好拍檔，惟獨感情舞台上，她仍然繼續在演獨腳戲。
儘管雯女從小父母異離，沒有完整的家，但她也從不渴望擁有，雯女說：「自己唔係好恨，有個陰影，因為我驚好似上一代咁，所以由細到大都唔覺得要結婚生仔，唔覺得要有個好幸福家庭。」
一個女人，無論事業有多成功，結婚生仔始終是人生終點站，但雯女卻有另一番見解：「我好了解自己，我係好鍾意小朋友，我以前做義工，都係照顧啲有智障嘅小朋友，但我測試到自己唔鍾意自己生，我從來冇呢個渴望，如果我真係要愛小朋友，我可以做好多嘢為佢哋，每個人有唔同使命，我何不做一個關心佢哋嘅大使，為佢哋籌款？到有一日我超乎我可以生嘅年紀、當有一日我想做阿媽，我絕對會收養小朋友，而唔會選擇求其搵個男人畀的精我！」
家務做到怕
不止結婚生子，就是提起做家務這幾個字，雯女已大叫怕怕：「我細細個就同阿爺阿嫲住，佢哋有風濕，我阿叔同姑姐一放學就唔知去咗邊度，成間屋嘅家頭細務都係我一腳踢，好似買餸煮飯、抹窗抹地、洗碗洗衫，而且以前係冇洗衣機，要用洗衫板洗，做家務做到好厭惡，我又點會渴望做家庭主婦？我係一個幾獨立嘅女人，有好多理想要實現，以前我可能迷失啲嘅時候，仲會愛情至上，想有個人喺身邊依靠，但𠵱家已經唔需要，因為我生活得好開心！我係好熱愛自由嘅人，好需要有個人空間，可能我仲未ready有個人24小時喺自己身邊啦。」
給女士借鏡
現年41歲的雯女續說：「以前我差唔多三字頭嘅時候，我有驚過年紀問題，到三字尾，我真係唔想踏入40歲生日，但𠵱家我有個幾大嘅使命感，好想自己做到其他女人嘅借鏡，畀佢哋知道，其實條路仲可以好好、仲可以輝煌過以前，唔好到咗某一個年紀就覺得自己冇用，唔結婚就冇人要咁。」
