鄭浩南（中）𠵱家喺大馬開咗幾間火鍋店，日前佢喺香港接受雜誌訪問時話，當初覺得大馬嘅火鍋店完全唔掂，湯底只係一盆滾水加兩片薑，賣嘅蝦蟹就係雪藏貨同死屍爛肉。佢呢番言論即時引起大馬其他經營火鍋店業嘅人不滿，群起反擊話大馬有活生生嘅蝦蟹，湯底都係真材實料嘅，只係當地市民經濟力同香港唔同，鄭浩南根本唔了解當地情況。