韓國13人組合SuperJunior（SJ）跳舞唱歌勁之餘，搞笑功力都有番咁上下。最近SJ分拆出嚟嘅6人組合SuperJuniorT，就為有線頻道節目《IdolWorld》拍咗個叫《宮T》嘅短篇搞笑劇，佢哋唔單止將原裝正版《宮S》嘅SE7EN擺上枱，連劇集《朱蒙》、《黃真伊》甚至F4主演嘅台劇《流星花園》都玩埋一份，真係笑到阿Net碌地。
整死親生仔
故事當然以朝鮮皇室為背景，男扮女裝嘅晟敏扮演皇后，一心要令愛兒恩赫王子做主上，所以視二王子李特為眼中釘，成日諗計仔令佢身敗名裂，最後晟敏打小人打到李特身亡，誰不知有位尚宮突然行出嚟話畀皇后聽，李特先至係佢親生仔，所有嘢都係已去世嘅前皇后佈局嘅！
阿Net喺網上睇過呢條片，最搞笑嘅係扮演太妃嘅「公主」金希澈，佢喺入面個名叫黃真伊，仲有幕同李特嘅搞鬼床上戲。至於扮演王子損友嘅神童出場時，唔單止蝦蝦霸霸個樣似足F4，同時又播出《流星花園》嘅主題曲《情非得已》，不過阿Net對呢位肥版F4成員真係唔敢恭維囉。
《宮T》前篇網址： http://tvpot.daum.net/clip/ClipView.do?clipid=2917269
《宮T》後篇網址： http://tvpot.daum.net/clip/ClipView.do?clipid=2959087
版主：阿Net
本欄逢周一至六刊出