22歲的無綫女藝員李綺雯（𡃁妹）去年被傳與霍啓剛約會睇波而傳出緋聞，雖然最終敵不過跳水公主郭晶晶，釣金龜未能成功，但前日𡃁妹搖身變成水着女，身穿性感比堅尼誘揸Benz的大隻型男，齊往大浪灣火辣辣曬太陽。
去年有傳霍啓剛背女友郭晶晶，夜會李綺雯睇世界盃，雖然緋聞曇花一現，霍公子與跳水公主至今仍如膠似漆，大輸家𡃁妹卻因緋聞而知名度提升。
不時情深互望
不過有趣的是郭晶晶憑水上英姿箍實金龜，𡃁妹竟也有樣學樣，前日穿上更性感的比堅尼泳衣，約會大隻型男到大浪灣曬太陽。
前日下午3時多𡃁妹現身沙灘，當時她身穿藍色比堅尼泳衣，與一名高大健碩、年約20餘歲的型男齊齊亁曬，二人有講有笑，不時情深互望。亁煎約兩粒鐘後，他們才各自沖身準備趕下場，此時𡃁妹發現記者在場即嚇得魂飛魄散，隨即手挽沙灘蓆及手袋衝入更衣室迴避。
15分鐘後，𡃁妹和大隻型男齊換背心短褲、踢拖作情侶打扮步離沙灘取車，當時女方戴墨鏡，面燶燶兼表現不耐煩，與她刻意保持距離的大隻男則低頭玩電話，並大步登上一部價值約33萬元的平治房車，但𡃁妹顯然不忿被撞破好事，趨前黑面怒睥記者，但其後還是默不作聲，𤷪𤺧得如谷氣田雞般，無奈扁嘴上車。
「佢有女朋友」
當駛至尖沙嘴九龍公園附近時，𡃁妹忽然落車，問她大隻男是否其新男友？她牽強地笑說：「唔係，佢有女朋友，唔好亂寫。」至於大隻男則駕車到土瓜灣美景街一停車場，泊車後即從後樓梯竄走，表現甚為鬼祟。
採訪、攝影：娛樂突發組