美國人成日被指係「大花筒」，經常要借貸度日，但據《華爾街日報》嘅網上調查顯示，喺接近2500名有份投票嘅網民之中，只有9%話自己入不敷支，18%就話會將賺到嘅錢使到盡，其餘73%都話佢哋嘅收入多過開支。
網友jdfree喺《華爾街日報》網上版嘅討論區度好自豪咁話：「我嘅稅前收入遠遠多過開支，我會將大部份嘅收入儲起或投資，從來都冇負債。」
romesh就話佢成世人只係借過一次錢：「73年借過2500蚊美金買咗架豐田車，3年還晒啲債，之後再冇借過錢嘞！」
不過，現年超過40歲嘅tpontes就因為有3個仔女讀大學，開支多過收入要食老本：「嚟緊嘅日子，我諗都要動用之前積落嘅儲蓄，預期將來嘅退休開支，會多過社會保障同退休金收入，但我相信問題不大。」
搵錢多過使錢
bconley99就話：「我鍾意用現金買嘢，就算碌卡，都會每個月找清卡數。其實我嘅家庭收入，可以負擔貴過𠵱家間屋2、3倍嘅樓、可以買一架比座駕貴好多嘅車，但我哋都冇咁做，所以收入比開支高好多；但好多朋友就唔係咁好彩，佢哋受到樓市影響，要不斷靠借貸嚟維持生活。」
racote亦認為知足常樂，「以前試過一年嘅開支相等於收入4倍，但𠵱家已經唔會再亂使錢。我只會買二手車，而自置嘅物業面積可能細過其他人，但足夠我同老婆容身就得，反正我哋冇仔女，支出比較少，可以供多啲退休金。雖然我哋唔算有錢，但比起嗰啲配偶一旦失業，就連樓都供唔起嘅家庭嚟講，生活真係冇乜壓力。」換言之，如果想過真正舒適嘅生活，就要量力而為、量入為出。