五十二歲嘅法國新總統薩爾科齊（NicolasSarkozy）上台，有關佢嘅私人新聞，漸多浮現。睇完之後，發覺法國真係與別不同。喺呢啲國家講甚麼情色，先至會有人欣賞，喺日本以外嘅亞洲國家講，道德標準絕不容許，更何況亞洲人根本唔識點講。
薩爾科齊入主愛麗舍宮，有太太與三個仔相伴。薩爾科齊與兩個兄弟四歲時畀父親保羅拋棄，保羅喺一九五九年另結新歡，雖然已經成立廣告公司，做咗老闆，甚為有錢，但拒絕撫養三個細路，所以薩爾科齊自小捱窮，加上得五呎五吋高，常遭人白眼，加上讀書成績普通，入到唔算出色嘅巴黎第十大學，得商業法律碩士學位，呢間大學係一九六八年學運搖籃，左翼大本營，偏偏薩爾科齊加入右派學生，不從眾，不從俗，殺出一條生路，畢業後立即從政，八三年（二十八歲）就成為巴黎近郊小城Neuilly嘅最年輕市長，以後平步青雲，卒成為總統。純種法國人應該好唔順氣，一個出身貧窮之匈牙利移民之子竟然可以擊敗所有血統好，成績好嘅精英，領導法國，實在係一個奇蹟。
得意之後，薩爾科齊就學老頭子，一九九六年拋棄糟糠妻。原來佢做市長期間，為一位新娘Cecilia證婚，竟然生螆貓入眼，向初為人婦嘅Cecilia追求，搞到人哋喺一九八九年離婚，成為佢嘅情婦，卒之薩爾科齊喺九六年離婚，前妻為佢生咗兩個仔，新太太喺九七年生多一名。之後各有各搞，薩爾科齊與《費加羅報》一名女記者Anne行埋，Cecilia一怒之下，○五年走咗去紐約同一位摩洛哥裔法國人住埋，畀ParisMatch（法國最大周刊）影咗相，薩爾科齊向周刊大老闆投訴，於是編輯被炒（仲唔係妨礙新聞自由！）。政治人物有咁多桃色新聞，喺美國一早玩完，喺英國亦會被迫辭職，在亞洲更加冇得講。嗱，法國人就當呢啲結婚、離婚、外遇、一夜情、一年情等視若無睹，現在仲選咗佢做總統呢，你話做法國男女幾好，盡情享受之餘，自己事業完全唔受影響。