如果以前有人對住我話：「你連狗都不如呀！」我肯定會㷫到爆，但做完呢次訪問之後先發現，「人不如狗」又有幾奇？睇睇𠵱家啲寵物酒店，陳設隨時正過你間房，仲有私家花園兼運動場！仲未夠豪！食嘅竟然係魚子醬、金箔燕窩，我都未試過呀！有乜辦法唔承認自己「狗都不如」？
記者：劉昱蘭
攝影：伍慶泉
Model：Nicky（TheGroup）
Top1寵物樂園高床軟枕使死人
講到住得豪，肯定非佢莫屬！佔地10萬呎，夠大自然豪得起，散步游水設施齊晒絕無問題。呢度有成60間房咁多，講到超豪，就肯定係總統套房。70呎室內房間連70呎戶外花園，呢個花園仲係私家㗎！香港地屋企細多雜物，狗仔住呢度，肯定更多跑動空間，比平時活躍10倍。
星級酒店又點少得豪華會所？泳池、草地、石地……吓？仲有有蓋室內足球場！夠打番場5對5喪追波。睇真呢個室內場4面都有窗採光，一啲都唔侷促。原來呢啲狗仔球場喺日本東京等大城市早就好Hit，通常都喺商廈天台上邊，真係狗仔都潮過我哋喇。追波追到身水身汗，最啱就係游陣水，800呎泳池點玩都得，旁邊仲有個細池，啱晒細狗。游完水仲有專人吹亁毛毛，我都想唔使郁就有人服侍呀！
所有狗仔皇帝住客每日都有最少4小時嘅戶外散步時間，點解要咁多？因為地方實在太大，兩個草地場加埋40,000呎，分別仲有4個500至2,000呎嘅石地場，咁多選擇，無咁多時間點玩得晒？
豪住
寵物樂園（24706928）
地址：元朗錦田北圍村1號
收費︰總統套房$150-$250/日（另有豪華房$125-$180/日），價格差別視乎犬種大小。
Top2太平洋寵物會做上等狗魚翅啷口
住得豪過人固然巴閉，不過靠食得夠豪都可以上位。你想話：唓，狗糧有幾豪？咁就先睇睇呢個菜單啦！前菜有魚子醬，跟住嚟個魚翅南瓜湯，主菜係金箔魚塊，最後嚟個低糖金箔燕窩做甜品！點睇？你又想話：嘩，狗食唔食得㗎？放心，獸醫Check過晒成份，精選咗呢批貴價食物，人狗貓一齊食都無問題。如果對金箔魚塊敏感，仲可以改羊、雞、豬等其他Dishes。放心啦，無油無糖無鹽㗎，絕對健康又滋味！
值得一提嘅係，呢度仲好Hi-Tech，有電視可以放映住主人嘅錄像，等寵物唔使心掛掛，住得安落。音響系統就播住歌，畀狗狗Relax一下，Keep住個度假Mood。
豪食
太平洋寵物會（35763909）
地址︰荃灣德士古道100號2樓B座
收費︰超豪套餐狗$1,888，VIP套房$300/日，影音設備房$480/日。玻璃標準房$135起。
Top3百樂寵物會全天候好親密
豪昅昅啲乜？之唔係你心愛嘅狗狗囉！家陣電腦科技咁發達，唔利用一下喺照顧寵物上，又點夠潮？有寵物店播錄像令你嘅寵物不時見住你，唔見一排都冇生疏，而呢間就更加照顧主人嘅需要，畀多$20一日，就有個WebCam全天候對住你嘅寵物。無論你身處天南地北，只要掛住佢，就可以即時上網，透過視像探訪你嘅寵物，絕對係超級體貼。
豪昅
百樂寵物會（24716939）
地址︰新界元朗逢吉鄉132號
收費︰普通房$80-140/日，冷暖氣房$100-160/日