最近有大學生話要探討性問題，搞到滿城風雨。講真，性問題真係好有探討嘅必要，收埋收埋，一知半解亂咁嚟，仲更加易出事。點都好，教育幾時都要趁早。今日就由中學生做起，先幫佢哋拆解10大性疑惑。有正確知識先至有正確態度，入到大學就更加醒！
記者︰劉昱蘭 攝影︰譚盈傑
Model︰Zue、威（IG綜藝社群）
鳴謝︰關嘉美醫生
我哋都好想探討
Mandy（17歲）
精子有維他命C㗎！
Windy（19歲）
仲有書話1茶匙就有5個卡路里！
細佬（18歲）
啲人成日講谷精上腦，我就唔信！
阿翟（19歲）
男仔有無G點㗎？
細妹（19歲）
食咗春藥有乜解救？
袁少（18歲）
我想知自瀆會唔會傷身。
Top1 飲精液好養顏？
精液營養豐富，多飲有益，呢個睇法好普遍，肯定係情色初哥的頭號疑問。
醫生話︰可能有病毒！
當食物咁睇，精子的確有營養，主要係蛋白質，加埋糖份、水份、磷、鋅等，飲咗落肚，身體唔會同你分營養來源，只要係營養佢就照吸收。但唔好真係以為多飲有益，處男都唔係100%亁淨，有乜病毒你未必知，直接吞落肚都係你蝕底。
Top2 用衞生棉條會破處？
破處，絕對係人生大事，咁破法咪好唔抵？咁重要，一定要搞清楚。
醫生話︰亂隊會破處
如果你係處女，唔啱手勢又大力亂隊，就真係會破處。處女想用就要搵醫生教，只要識用就唔會有問題。因為處女膜並非密不透風，而且有彈性，所以只要將棉條放啱位置，處女膜根本唔會因用棉條而穿。
Top3 自己下面短過人？
唔少男仔喺成長過程中都有過咁嘅疑問，話晒係子孫根，唔緊張就假！
醫生話︰大小無關功能
香港真係無正式研究做過男士陰莖嘅長度，所以都好難講點先算係短過人，但長度絕對同你手掌幾長個鼻幾大等等完全無關。咪介意長度，大小唔影響功能，結構正常如廁直線進行，已經幸福過好多人。
Top4 沖熱水涼、蹺腳、電話放褲袋會殺精？
醫生話：精子會熱死
精子係要低溫生存，假如你晚晚沖涼都校到好熱先舒服嘅話，真係會有影響。至於蹺腳，除非你Keep住日日蹺10幾20個鐘，先會令睾丸升溫而有影響。另外電話輻射係咪咁得人驚就未有實質數據，真係唔放心就買條電話繩喇。
Top5 食蒜頭陰部有陣味？
醫生話：不足為奇
唔好睇到陰道咁神秘，食得太多辛辣同刺激性嘅食物，口氣、汗味、尿味都會有影響，陰道都係身體其中一部份，同樣有影響亦不足為奇，但係適量咁食係絕無問題，可以放心。
Top6 經常自瀆精盡人亡？
醫生話︰想做就做冇問題
其實自瀆都係解決性需要嘅一種正常方式，只要唔影響日常生活，其實問題不大。而且精子會不斷更新，70幾歲都可以生仔，身體健康性功能自然保持正常。
Top7 「咖喱雞」因爆血管？
醫生話︰爆都冇有怕
絕對無錯，「咖喱雞」出現係因為爆血管，不過唔使擔心，只係爆微絲血管。咀得肉緊或者忍唔住咬咗啖，就可能會爆微絲血管，打排球打得激都會爆，所以「咖喱雞」都只係一啲瘀傷。
Top8 G點喺邊度？
醫生話︰可以喺身體任何部份
G點係由一名法國婦產科醫生Grafenberg發現，所以取其名的第一個字母命名，其實係指女性最敏感嘅地帶，不過G點絕對唔係淨係喺下體，真係有人嘅G點喺嘴唇或者手仔。男仔都有G點，不過男仔易衝動，女仔就比較難，所以特別有個名稱畀女士嘅特別敏感部位。
Top9 男人天生鹹濕過女人？
醫生話︰男人較易衝動
其中一個引起性慾嘅原因，係同雄性荷爾蒙嘅水平有關，男人之所以為男人，當然係因為佢雄性荷爾蒙多過女性，所以男人的確比較容易衝動。
Top10 朱古力食High人？
醫生話︰冇直接關係
除咗藥物，食物同性慾嘅關係其實好間接，只係的確有啲食物易令人情緒開心，咁心情好，就放開懷抱，ReadyForSex啫，你估係春藥咩。如果食咗春藥就真係聖女貞德都無得救，所以要帶眼識人喇。