最近有調查話，日日啤一啤，Keep住雄赳赳。不過男人日日雄赳赳，女人可要打醒十二分精神，分分鐘無辜辜變獵物。陳腔濫調都有話，「酒能亂性」，要保持不「亂」，最緊要認清「陷阱」，花碌碌外表討好嘅Cocktail，肯定係高危一類。唔想飲幾飲就出晒醜蝕晒底，就一定要認清呢十大掯酒！
文：TigerL
攝：Wilson、周旭文
鳴謝：MindenPlaceRestaurant&Bar、
BoozerooLoungeKaraoke、
PhoenixPubKaraoke、man169.com
1.Aroundtheworld一杯冧
名副其實，集合世界各地之烈酒，溝酒達十種以上，有伏特加、威士忌、白蘭地、薄荷酒、Gin、Rum、Tequila、Cointreau……差唔多講得出都有份，酒精成份有成70%，即使幾飲得，一兩杯，一定冧！各位靚女，記得認住佢，否則俾人一隊即冧，後果自負。
2.LongIsland英式至勁
LongIsland分英式和美式調法，簡單講係以酒精成份濃度嚟分，英式較濃，通常一杯有50%以上酒精，反之美式較淡，酒精量大約20%（以Oz計算）。不過一般酒吧都只會用美式調校法，但係為免有人心術不正出蠱惑，飲前記得搞清楚！
3.Lookforstar甜心陷阱
Lookforstar早幾年本已銷聲匿迹嘅名字，近排又重現江湖。比LongIsland易入口，但係飲過就知絕對係掯嘢，主要成份有谷古酒，即係做朱古力嗰隻，所以飲落味道幾好，女士最易傾心，不過係人都知，朱古力有催情作用㗎……
4.Sperm擺明挑逗
冇錯係叫「精子」，咁點解搞到個名咁激？睇睇佢個賣相就心照啦！首先有Kahlua打底，跟住有Sambuca，最後放兩滴Baileys入去，就全靠呢兩滴嘢，成杯酒即刻令人充滿遐想，未入口已經夠晒挑逗！
5.林寶堅尼3秒飲清
飲前用火機烘熱杯邊，再燒面層嘅酒，一有火就馬上用飲管用力吸，吸飲途中再加Baileys同BlueCuracao，一輪嘩聲之後都唔知飲咗乜，但就周身熱辣辣！
6.Ghost飲大唔多覺
成份有Vodka同Bacardi151，呢隻酒無譁眾取寵嘅外表，而且細細杯，危險之處係令你掉以輕心，唔覺唔覺，又多飲兩杯。
7.FlatLiner辣到㷫烚烚
喺香港，FlatLiner算係較新嘅一種Cocktail，不過外國就已經興咗好耐。呢隻酒主要由Vodka加Sambuca而成，酒精濃度講真唔算好高，不過最特別係中間嗰片淡紅色似浮雲咁嘅物體。呢嚿「雲」，原來係「Tabasco」！辣一辣，肯定加速㷫烚烚。
8.B52細細杯害死你
成份有GrandMarnier、Baileys、Kahlua，外表五顏六色夠晒搶鏡，所以開Party嘅人就最鍾意飲，閒閒哋十杯八杯，結果當然又係細細杯害死你，十分鐘就酒精上腦，就算你係酒神，都要坐定定休息一陣，仲扮勁滿場飛？擔保唔使五分鐘就要入廁所奏大型交響樂。
9.IceShot果汁Feel呃倒人
有vodka、Gin、Rum加蘋果酒同埋杏仁酒，又係女士鍾情嘅配搭，但係唔講你唔知，酒精成份有成50%。不過佢大大杯，有啲果汁Feel，睇落好平易近人，講到殺傷力，可以話係中等，之但係，如果當佢係汽水，一樣冧。
10.Manhattan討女歡心
有人話呢隻酒係因為美國曼克頓區嘅人鍾意飲而命名，不過由外在到內在，佢睇落都係畀人Sweet嘅感覺，而唔係Manhattan嘅冷漠。主要成份係SweetVermouth同BourbonWhiskey，酒味帶甜，加埋Cherry，討女歡心，非佢莫屬。
