一位老師睇電視新聞，見一位女記者訪問《中大學生報》女編輯陳玉峰及另一位編輯，不禁叫一聲：「唉吔，三個都係我哋學校畢業生。」此學校係老牌名校，出名到極，周梁淑怡、鄭慕智，李國能等等都係校友。呀，評馬人吳嵩亦係，馬主之中，更多人係校友。男女校嘅學生，入咗中大，唔知係唔係見到環境極為自由，於是想做一啲與中學生思想徹底告別嘅事情呢？好似陳同學咁，佢嘅母校老師見到一名高IQ叻女入讀法律係，花唔少時間搞學生報，涉及情色版，可能會覺得幾amazing！
代課老師B近半年來去過兩間中學代課，一間係band3（以前叫band5），上堂時冇學生睬佢，嘈到冇命。一位女生口咬一支煙，以挑逗性目光望住代課B，用粗口問候，嚇到代課B不敢正視之。然後到一間band1學校，嘩，情況好唔同，學生全部肅靜，聽話聽教，代課B一聲：「自由溫習。」啲學生立即做數學、讀英文，乖到不得了。代課B嘆曰：「乜香港學校有咁大分別，讀書如天堂與地獄，我平時去慣大學代課（做兼職講師），今年第一次去中學代課，先知道點解一啲學生永遠冇法子入到大學。」代課B睇《中大學生報》情色版新聞，有佢自己嘅角度，佢話：「我不能明白band1學生讀中學時咁乖、咁勤力讀書，到十九歲入大學讀一年級，點會對情色有認識，佢哋有乜法子引起社會討論性問題？Band3學校嗰位女生可能知得更多，但佢點可能入到大學？」
或者係年青人覺得香港啲中學太束縛，太令佢哋窒息都唔定，於是入咗大學就嚟一次一百八十度性格大挪移。一位著名女校乖乖女到咗加州讀書，唔夠三個月就同一個新認識男同學同居，成績大大退步，嚇親媽咪，問教授點辦；教授話：「十八歲女子與人同居，學校無權干涉，此乃父母與兒女坐低慢慢傾嘅問題，至於你位千金，如果學業成績繼續唔掂，恐怕要出校噃。」為人父母唔好以為送咗子女入大學，就可以安樂晒。