時間：90年9月
地點：香港
人物：甘國亮、鄭裕玲
經過：甘國亮同鄭裕玲（嘟嘟），曾幾何時係圈中數一數二嘅金童玉女，但佢哋兩個拍拖10年都係分手收場，當年分手原因，不單止係因為兩個人唔再相愛，而且更因為冇性生活。
90年9月，甘國亮接受雜誌訪問時承認同嘟嘟分手，佢話嘟嘟喺倫敦做嘢，佢上去嘟嘟何文田屋企幫佢照顧寵物，點知嘟嘟原來靜雞雞返咗屋企唔話佢知，嘟嘟見到甘國亮之後，第一句就同佢講：「我唔再愛你！」然後第二句就話：「我哋冇性生活！」甘國亮仲話，冇性生活呢樣嘢其實係嘟嘟早年主動同佢提出，當時嘟嘟以宗教信仰為理由，話結婚之前唔可以有性關係，雖然當時自己覺得好難受，但都依然順晒對方意思。
甘國亮引述嘟嘟因為有愛冇性而同佢分手，當年喺圈中引起好大迴響，喺同年嘅9月27號，嘟嘟喺新加坡登台返香港，被追問到係咪有愛冇性而分手時，嘟嘟冇否認亦冇承認，只係話唔想同對方一人講一句好似罵戰咁，總之分手之後各行各路。
嘟嘟同甘國亮分手之後兩年幾，就同呂方拍拖，雖然初時全世界都唔睇好，覺得佢哋外形完全唔相襯，結果佢哋拍拖14年，到今時今日仲喺一齊，令唔少人跌晒眼鏡。
本欄逢周一至周六刊出