香港真係遍地黃金，根據早前嘅統計表示，喺香港，5.2%嘅成人係百萬富翁，無論男女只要你搵到頭好人家，就可以唔使做有福享。咁你會唔會有機會娶到個有錢老婆或嫁入豪門呢？拎塊鏡照一照，若你有以下特徵，就知你靠另一半享福嘅成數都幾高！無樣中的話，麻煩都係靠自己對手，踏踏實實搵餐晏仔食啦！
記者：區佩嫦
資料來源：方海閱
（www.fonghoiyue.com.hk）
Best4闊太相
1.額略高闊丈夫易有成
女人和男人一樣，額靚嘅話條命都會好啲。若額形略為高闊、飽滿，兼且三亭均勻（額至眉為上亭、眉至鼻孔為中亭、鼻孔至下巴為下亭）代表呢個女人少年運佳，容易嫁得有家底或有成就嘅丈夫。若果靚額上有疤或者凹陷嘅話，都會影響運程。
2.眼大有神天生貴相
由額頭去到對眼喇！眼形秀長、眼珠大且充滿神采嘅女人，屬天生貴相，為人心地善良，有獨立思考能力，說話及行為舉止極有分寸，深得老爺奶奶嘅歡心，嫁入豪門印印腳享夫福。
3.鼻直且高享盡夫福
鼻樑長直且略高，天生能夠享夫福。若果鼻樑過高，為人會較自我，影響夫緣。如果鼻樑上有疤痕或者凹陷嘅話，即使鼻樑幾長幾直幾靚都係無用。
4.嘴細唇紅以夫為主
安守本份係嫁入豪門做少奶奶的先決條件，嘴細嘅人天生較安守本份，事事以另一半行先。嘴細兼唇紅、牙齒整齊潔白嘅話，是貴相嘅象徵，生兒育女後能夠母憑子貴，地位穩如泰山。
Best4夫憑妻貴相
1.額闊飽滿吃得開
要睇男人係咪可以娶到有錢女人做老婆，可先從額頭睇起。額頭高闊，代表交際運佳，即俗語話：「吃得開」；額頭飽滿則代表智力高，懂得利用自己嘅優點去接近女貴人，所以喺女性圈中吃得開，較容易從中搵到嬌妻。
2.太陽穴飽滿老婆有名望
睇完額頭，可以望落太陽穴位置，相學上太陽穴稱為「夫妻宮」，如果夫妻宮飽滿，無青筋兼略泛紅光，有呢種面相嘅男人，大有機會娶一個有名望、有財有勢嘅女人做老婆，而婚姻生活亦會好Sweet、好幸福。
3.耳大肉厚享老婆福
耳大肉厚，仲有微微彎曲朝向前嘅耳珠，喺相學上稱為「兩耳朝海」或「兩耳朝珠」。有呢種耳相嘅男人，加埋個紅彤彤、嘴形端正嘅桃花嘴，為人宅心仁厚，多數能娶到個有錢女做太太，易享妻福。
4.面圓有肉老婆能幹
塊面圓碌碌嘅人往往畀人有福氣嘅感覺，而男人面圓有肉嘅話，一生都可以得到貴人嘅幫助，而且異性緣佳。若果加埋顴骨有肉嘅話，多數能娶到一位能幹、有家底嘅女人做老婆，夫憑妻貴。
