繼《法證先鋒》和《寫意人生》被指抄襲人氣美劇《CSI》及日劇《電車男》後，無綫近日播映的《師奶兵團》又被發現喪抄美國收視高企劇集《靚太唔易做》，劇集以主婦離奇自殺作開場更是抄得一模一樣，看來無綫編劇工作認真易做！
由鄧萃雯、商天娥和葉童主演的無綫劇集《師奶兵團》，本周一首日播映即收視高開，平均收視有32點，即約有207萬名觀眾，最高則有33點，約有214萬名觀眾捧場，幾乎與近日熱爆的《溏心風暴》打成平手。
不過這部講述屋邨師奶生活的《師》劇，故事大綱、部份情節及人物設定原來跟美劇《靚太唔易做》（DesperateHousewives）十分相似，特別是《師》劇首集中，馬國明太太殷櫻離奇自殺身亡一幕，幾乎與《靚太》以主婦Mary神秘吞槍自殺作開場一模一樣，又學《靚太》以旁白推進劇情。而馬國明對太太的死因有所隱瞞，及唐寧為調查好姊妹殷櫻死因刻意接近鄧萃雯一班師奶的故事發展，也跟《靚太》的情節十分相似。
增添懸疑
監製直認仿效《靚太》
《師》劇中的葉童跟《靚太》中的Gabrielle，同樣因丈夫生意失敗而由闊太淪為普通師奶；鄧萃雯懷疑丈夫謝天華有易服癖而患上抑鬱症及焦慮症，也跟《靚太》中的Bree發現丈夫Rex有性虐待癖好，須接受心理輔導等人物設定及故事情節大同小異。
有關《師》劇勁抄《靚太》一事，近日也引起了網友熱烈討論，前日《師》劇監製林志華接受記者電話訪問時，承認該劇加插了《靚太》的懸疑情節，但強調只是其中一個枝節，並非全劇主線。林志華說：「我有睇《靚太》，自己都好鍾意，《師》劇開頭講馬國明太太自殺嗰部份，其實只係其中一個元素，我哋唔係好刻意加落去，亦唔係要觀眾去查案，睇吓邊個害死邊個，成個劇主力亦唔係sell呢樣嘢，我哋咁做，只係想製造角色上一啲衝突同矛盾，只要大家睇多一個星期，就會知道個分別喺邊度。」
商天娥前日接受電話訪問時說：「我有聽過有人咁講，但自己冇睇過《靚太》，冇法子講到兩個劇有乜嘢相同，不過我覺得冇乜所謂。」角色有抄襲《靚太》之嫌的唐寧說：「我冇理呢啲嘢，好多戲同歌出到嚟都俾人話抄，我哋做演員最緊要做好本份。」
演員冷靜
「最重要係睇得開心」
此外，謝天華則說：「橋段似唔似見仁見智，所謂人有相似，物有相同，我覺得最重要係大家睇得開唔開心，有冇娛樂性畀到大家啫！」郭政鴻則說：「其實成部劇都唔係sell馬國明太太自殺嗰樣嘢，主要係圍繞幾對夫婦之間相處嘅問題，大家睇多幾集就知道唔同㗎啦！」
採訪：林妃
最高蘋嬸
我蘋嬸閒時都煲唔少外國劇集，睇嚟我都好有潛質做TVB編劇，唔知請唔請parttime呢？
蘋果娛樂特派評述員蘋嬸
話你知：人物內容多處雷同
《師奶兵團》與《靚太唔易做》雖然是中西師奶劇集，兩地文化背景差異頗大，但兩劇的人物設定和故事發展卻十分相似。
自殺開場
《靚太唔易做》故事以一名主婦Mary離奇吞槍自殺開始，其夫Paul千方百計隱瞞太太死因，令事件變得懸疑神秘；《師奶兵團》首集同樣以師奶YoYo（殷櫻飾）服藥自殺作開場，其夫甘誠俊（馬國明飾）一樣對太太的死因諸多隱瞞。
復仇角色
《靚太唔易做》中的Felicia因姊姊突然人間蒸發展開調查，後來知道姊姊是被Paul所殺而展開報復；《師奶兵團》的舒小曼（唐寧飾）因好姊妹YoYo離奇自殺，特意由美國返港調查死因，誓要為好姊妹討回公道。
折墮貴婦
《靚太唔易做》的靚太Gabrielle原為闊太，一向喜歡揮霍及買名牌，後來丈夫生意失敗，慘至家中停水停電，要跑到鄰居家的泳池洗澡；《師奶兵團》的丁梅香（葉童飾）同樣本是家住半山的闊太，周身名牌，後因丈夫生意失敗搬入居屋。
怪癖丈夫
《靚太唔易做》的Bree無意中發現丈夫Rex有SM癖好大受打擊，要接受心理輔導；《師奶兵團》的蒙嘉嘉（鄧萃雯飾）的丈夫方彥祖（謝天華飾）則有易服癖，令太太因而患上抑鬱症及焦慮症。
落水出醜
《靚太唔易做》的Lynette帶同子女出席社區派對時，3個兒子竟在泳池忘形嬉水，完全無視母親的勸喻，要Lynette失儀地落水拉他們出來；《師奶兵團》連這場面都抄足，講述丁梅香（葉童飾）盛裝出席派對時跌落泳池。
